“Ethan is supreme” нэрээрээ алдартай нүүр хувиргагч, инфлүэнсер Этан Питерс 17 насандаа хорвоог орхижээ. Этан Питерсийн нас барсан шалтгаан одоогоор тодорхойгүй байгаа аж. Тэрбээр Инстаграмд хагас сая гаруй, Youtube-т 140 мянган гаруй дагагчтай байв.
Түүний аав Жералд “Хүү маань сайхан сэтгэлтэй, хүнийг байгаагаар нь хүлээж авдаг хүн байсан” гэжээ. Харин түүний найз, инфлүэнсер Ава Луис “хамгийн сайн найзаа алдлаа” хэмээн бичиж эмгэнэл илэрхийлсэн байна. Тэрбээр найзынхаа талаар “Этан урлагийн мэдрэмжтэй, үнэхээр авьяаслаг урам зориг өгдөг нэгэн байсан” хэмээн бичжээ.
Өнгөрсөн жил Vice сайтын нэгэн нийтлэлд түүний нүүр хувиргалтын талаар “хүний анхаарлыг эрхгүй татдаг, хурц шийдэлтэй, сэтгэл хөдөлгөм, заримдаа аймшигтай харагддаг” хэмээн тодорхойлон бичсэн байна.
Тэрбээр 2017 оны зун гэхэд 100 мянган дагагчтай болсон байна. Нийгмийн сүлжээнд идэвхтэй байсан тул Христийн сургуулиас нь түүнийг ёс зүйн хэм хэмжээг зөрчиж байна хэмээн шүүмжлэх болжээ. Удалгүй тэрбээр сургуулиа хаясан бөгөөд цахимаар хичээллэхийн зэрэгцээ өөрийн “Hellboy” нэрийн хувцасны үйлдвэрлэлээ эхлүүлсэн байна.
