Арсенал” Австрийн багтай хүндхэн тоглолт хийлээ

Европын хөл бөмбөгийн холбооны “Европа лиг”-ийн хэсгийн тоглолтууд урьд шөнө эхлэхэд Австрийн “Рапид Вьен” клуб “Арсенал”-тай хүчтэй өрсөлдөөн өрнүүллээ.

Австрийн баг талбайдаа тоглолтын эхнээс өндөр санаачлагатай тоглолт үзүүлж байсныхаа хүчинд 51′ дэх минутад тэргүүллийг авсан юм.

Гоол оруулах нь бүү хэл хаалгаруу ч цохиж чадахгүй байсан “Арсенал”-ын залуус тоглолтын төгсгөлийг чанартай хийж, Давид Луиз /70’/, Аубамияанг /74’/ нарын оруулсан гоолоор хожлоо.

Арсеналаас гадна Тоттенхэм, Лестер сити, Эй Си Милан, Виллареал, Хофенхайм, Рома, Бенфика, Гранада, Лилль, Реал Сосьедад гэсэн топ лигийн багууд энэ өдөр тус тусын гурван оноогоо халааслав.