А.Амбасэлмаа: Улаанбаатарт 7, Сэлэнгэд 3, ХӨСҮТ-ийн эмч, сувилагч 7 хүн халдвар авсан

Манай улсад коронавирусийн халдварын батлагдсан тохиолдол арваннэгдүгээр сарын 14-ний байдаар 416 болоод байна.

Тэгвэл үүнээс хэд нь дотоодод гарсан халдвар болохыг ХӨСҮТ-ийн Тандалт судалгааны албаны дарга А.Амбасэлмаа “Улаанбаатарт тээврийн жолоочтой холбоотой 7, Сэлэнгэ аймагт 3, ХӨСҮТ-ийн эмч мэргэжилтэн 7 хүн бүртгэгдсэн байна. Үлдсэн халдвар нь зөөвөрлөгдөн ирсэн” гэсэн мэдээллийг өглөө.

ХӨСҮТ-ийн Тандалт, судалгааны албаны дарга А.Амбасэлмаагийн өнөөдөр өгсөн мэдээллээс хүргэвэл “Арваннэгдүгээр сарын 13-ны өдөр 820 хүнд шинжилгээ хийхэд гурван хүнд коронавирусийн халдвар илэрч, 817 хүнээс илрээгүй. Гурван батлагдсан тохиолдлын нэг нь 4 настай хүүхэд, мөн ажиглалтад хянагдаж байсан эмчийн шинжилгээнээс халдвар илэрсэн.

Батлагдсан тохиолдлын ойрын хавьтал болох 140 хүний шинжилгээнээс нэг хүнд халдвар илэрсэн. Хоёрдогч хавьтал болох 2,775 хүнд шинжилгээ хийснээс 644 хүнийх нь хариу гараад байна. Эдгээр хариу бүгд сөрөг гарсан. Сэлэнгэ аймагт батлагдсан тохиолдлуудын ойрын хавьтал болох 150 хүнд шинжилгээ хийхэд 103 хүний шинжилгээний хариу гарсан бөгөөд сөрөг байна. Дархан-Уул аймагт 136 хүнд шинжилгээ хийхэд бүгд сөрөг гарсан. Монгол Улсад батлагдсан нийт тохиолдол 416 болсноос эдгэрсэн 328 хүн байна. Өнөөдөр ХӨСҮТ-ээс 11 хүн эдгэрэн гарч, ажиглалт руу шилжсэн. ХӨСҮТ-д 83 хүн эмчлэгдэж, нэг хүн хүнд, 16 хүн хүндэвтэр, 66 хүн хөнгөн байна” гэлээ.

Шинжилгээ хийсэн 820 хүнийг ангилбал,

• Арваннэгдүгээр сарын 2-нд Суданаас тусгай үүргийн нислэгээр ирсэн 120 хүний давтан шинжилгээ
• Тусгаарлах байранд байгаа гурван хүн
• Тандалтын 22 шинжилгээ
• Орхон аймгийн 3 иргэн
• Батлан хамгаалахын 64
• ХӨСҮТ-ийн 45 эмч ажилтанд шинжилгээ хийхэд коронавирус илрээгүй байна.