Пеп Гуардиола “Манчестер сити” дэх гэрээгээ сунгалаа

Английн хүчирхэг баг “Манчестер сити” клубийн дасгалжуулагч Пеп Гуардиола багтайгаа дахин хоёр жилийн гэрээ байгуулж, 2023 оны зун хүртэл Манчестер хотод ажиллахаар боллоо.

Өдгөө 49 настай Испани дасгалжуулагч Пеп Гуардиола 2016-2017 оны улирлаас эхлэн “Хотынхон”-ыг удирдаж премьер лигийн аваргаар хоёр удаа тодорч, Холбооны цомыг нэг, Лигийн цомыг гурван удаа өргөсөн юм.

“Манчестер сити” клуб дэлхийн шилдэг дасгалжуулагчдын нэг Пеп Гуардиолаг эгнээндээ элсүүлж лигийнхээ аваргаар хоёр удаа тодорсон тул гэрээг сунгасан хугацаандаа Аваргуудын лигт түрүүлэхийг зорих нь дамжиггүй.

Пеп Гуардиолагийн гаргасан амжилтууд:

Барселона клубт:
-Дэлхийн шилдэг клубийн дасгалжуулагчаар хоёр, Аваргуудын лигийн аваргаар хоёр, Испанийн лигийн аваргаар гурав, Клубүүдийн дэлхийн аваргаар хоёр, ЕХБХ-ны Супер цомыг хоёр, Испанийн супер цомыг гурав, Испанийн цомыг хоёр удаа тус тус хүртсэн.

Байерн Мюнхэн клубт:
-Бундес лигийн аваргаар гурав, Германы цомын аваргаар хоёр, Клубүүдийн дэлхийн аваргаар нэг, ЕХБХ-ны Супер цомыг нэг удаа тус тус өргөсөн байдаг.

Манчестер сити клубт:
-Премьер лигийн аваргаар хоёр, Холбооны цомын аваргаар нэг, Лигийн цомыг аваргаар гурав, Английн супер цомд хоёр удаа түрүүлээд байна.

Эх сурвалж: bbc.com