Замын-Үүдийн гаалийн ажилтан бусадтай бүлэглэн хүний аминд хүрсэн хэрэг гарчээ

Дорноговь аймгийн Замын-Үүд сумын нутаг дэвсгэрт өнгөрсөн нэгдүгээр сарын 22-ноос 23-нд шилжих шөнө гаалийн ажилтан бусадтай нийлэн хүний аминд хүрсэн ноцтой хэрэг гарчээ.

Тодруулбал, Замын-Үүдийн гаалийн байгууллагад инженер ажилтай Б гаалийн байцаагчаар ажиллаж байсан Г нар нь архи согтууруулах ундааны зүйл хэрэглэсэн үедээ иргэн С -тэй үл ялих шалтгааны улмаас маргалдаж, улмаар амь насыг нь хохироосон хэрэг үйлдсэн байна. Харин талийгаач С нь ганзагын наймаа хийдэг нэгэн бөгөөд хэрэг гарахаас өмнө Улаанбаатараас Замын-Үүд суманд очоод байсан гэдгийг эх сурвалж мэдээлж байна.

Иргэн Г нь урд нь Замын-Үүдийн гаалийн байгууллагад улсын байцаагчаар ажиллаж байсан, эрүүгийн хэргээр ял шийтгэл эдэлж байсан нэгэн гэдгийг мөн эх сурвалжийн мэдээлж буй.

Өдгөө сэжигтэн Б, Г нарт  эрүүгийн хэрэг үүсгэн, Дорноговь аймгийн урьдчилан цагдан хорих төвд 30 хоногоор саатуулан шалгаж буй аж.