Оросын тусламжийн хоёр дахь онгоц Нью-Делид газардлаа

ОХУ-аас Энэтхэгт үзүүлж буй эмнэлгийн хэрэгслийн тусламжийг тээвэрлэсэн “Ил-76” онгоц хэдхэн минутын өмнө Нью-Дели хотод газарджээ.

ОХУ-ын Онцгой байдлын яамны онгоц Индира Гандигийн нэрэмжит олон улсын нисэх буудалд газардсан байна.

Оросын Онцгой байдлын яамнаас хоёр тээврийн онгоцоор Энэтхэг рүү 22 тонн эмнэлгийн тусламжийг хүргэнэ гэж мэдээлсэн билээ.

Коронавирусний халдварын нөхцөл байдал маш хүнд байгаа Энэтхэг улсад олон улс тусламжийн гараа сунгаж байгаа билээ. Оросоос Энэтхэг рүү илгээсэн тусламжид хүчилтөрөгчийн баяжуулагч, хиймэл амьсгалын аппарат, COVID-19-ийн эсрэг эмүүд болон бусад шаардлагатай эмнэлгийн болон эмийн бүтээгдэхүүн багтжээ.

ОХУ мөн ирэх тавдугаар сарын 1 гэхэд Спутник V вакцины эхний тунг Энэтхэг рүү нийлүүлэхээ мэдэгдсэн.

Энэтхэг улсад сүүлийн өдрүүдэд хоногт 300 мянга гаруй халдварын тохиолдол бүртгэгдэж байгаа юм.