Монгол Улс вакцинжуулалтын эрчмээр дэлхийд ДОЛООДУГААРТ бичигджээ

Өрхийн эмнэлгүүд ойрын хавьтлыг хянахдаа ковид нь халдварт өвчин учир хүн бүрийн гэрт очих боломжгүй байгаа энэ үед цахимаар хянаж, дүүргийн тандалтын баг гэрээр нь очиж байгаа аж.

Өнөөдрийн байдлаар 4746 хүн хэвтэн эмчлүүлж байгаа бол 7955 хүн гэрийн ажиглалт, тусгаарлалтад байгаа талаар ЭМЯ-ны Эмнэлгийн тусламжийн зохицуулах газрын дарга Б.Буянтогтох мэдээллээ.

Нэг хүн өвдөхгүй байвал дөрвөн хүн өвчлөхгүй байх боломжтой учир халдварыг хумихад иргэн бүрийн оролцоо чухал гэдгийг ЭМЯ-наас дахин хэлсэн юм.

Иргэн бүрт өвдөхгүй байх боломж байгааг ЭМЯ-ны Эмнэлгийн тусламжийн зохицуулах газрын дарга Б.Буянтогтох онцлоод “Манай улс вакцинжуулалтын эрчмээрээ дэлхийд долоодугаар байранд явж байгаа. Иймээс вакцинжуулалтад өргөнөөр хамрагдах боломжтой байгаа энэ үед вакциндаа хамрагдахыг та бүхэндээ уриалъя” гэлээ.

Дэлхийн 180 оронд вакцинжуулалт идэвхтэй явагдаж байгаа бөгөөд хүн амынхаа 60-аас дээш хувийг вакцинжуулж, ЭМЯ нь иргэдэд амны хаалтгүй явж болохыг зөвшөөрөхөөс нааш амны хаалтаа авч болохгүй юм. Иргэн та вакциныхаа хоёрдугаар тунд хамрагдсан ч 14-21 хоногийн дараа дархлаа тогтох асуудал яригдана.

Нийслэлийн хэмжээнд одоогоор 30 эмнэлэг ковидын тусламж үйлчилгээг үзүүлж байгаа бөгөөд амьсгалын аппаратны нөөц хангалттай байгаа гэнэ.

Харин ковидын эсрэг ажиллаагүй эрүүл мэндийн ажилтан гэж байхгүй болж, 20 гаруй мянган ойрын хавьтал байгаа энэ үед Өрхийн эмнэлгүүдийн ачаалал ихэсч, мөн амьсгалын аппарат ажиллуулах хүний нөөц дутагдаж байгаа аж.