Биткойны ханш 10 мянган ам.долларыг давжээ

МОСКВА. /TASS/. Биткойны ханш өнгөрсөн оны 10 дугаар сараас хойш анх удаа 10 мянган ам.долларын босгыг давжээ. Энэ тухай “Coindesk” криптовалютын биржийн мэдээлэлд дурджээ.

Орон нутгийн цагаар 15:42 цагт биткойны ханш 10.145 мянган ам.долларт хүрсэн байна. Биткойны ханш 2017 оны 12 дугаар сард хамгийн өндөр буюу 20 мянган ам.долларт хүрч байсан юм.

Биткойн нь блокчейн зарчим дээр үндэслэсэн криптовалютын нэгэн төрөл бөгөөд гуравдагч талыг оролцуулахгүйгээр “p2p” системээр сүлжээнд гүйлгээ хийж болох цахим валют юм. Анх 2008 оны 10 дугаар сард Сатоши Накамото гэдэг хүн биткойн хэмээх цахим валютын зарчмыг тайлбарласан өгүүллийг нийтэлж байсан түүхтэй.