Э.Цэндбаатар: Би Монголынхоо нэрийн өмнөөс мэргэжлийн боксоор дэлхийн дэвжээнд гарна

Серби улсад зохион байгуулагдах Боксын ДАШТ удахгүй болно.Тэгвэл Киргизстан улсаас МУГТ Э.Цэндбаатарыг ДАШТ-д өөрийн орны нэрийн өмнөөс тоглох санал тавьсан. Хэрэв саналыг хүлээн авбал тэмцээнээс өмнө иргэншил өгч, ДАШТ-ий 60 кг жинд оролцуулах гэнэ. Түүнийг цалинжуулж, байр, унаагаар хангах санал тавьсан гэх мэдээлэл тархаад буй. Уг мэдээлэл бодитой эсэхийг тодруулахаар Э.Цэндбаатартай холбогдлоо.

-ДАШТ-д Киргизстаны нэрийн өмнөөс тоглох саналыг тухайн улсаас өөрт тань тавьсан гэсэн. Үнэн үү?

-Надад Киргизстан улсаас санал ирсэн.

-Хариу өгч амжсан уу?

-Би огт хүлээн зөвшөөрөөгүй.

-Яагаад. Тамирчин хүнд таатай саналыг тавьсан биш гэж үү?

-Би одоо мэргэжлийн бокст албан ёсоор орсноо мэдэгдэж байна. Монголынхоо нэрийн өмнөөс дэлхийн дэвжээнд гарна. Тэмцээнийхээ бэлтгэлд ороод ид дундаа явж байна. Ирэх арваннэгдүгээр сард анхны тулаанаа хийнэ.

-Мэргэжлийн боксынхоо анхны тулааныг хаана хийх гэж байгаа вэ?

-Москвад. Дараагийнх нь тулаан АНУ-д болно. Би яг одоо бэлтгэл дээр байгаа болохоор тухтай ярьж чадахгүй нь ээ.

-Спортын өндөр амжилт хүсье?

-Баярлалаа. Түмнийхээ итгэлийг алдахгүйн тулд улам хичээнээ.

Эх сурвалж: ӨГЛӨӨНИЙ СОНИН