Ардчилсан нам “Онц Их хурал” зарлалаа

2021 оны Ерөнхийлөгчийн сонгуулийн өмнөөс АН-ын дотоод зөрчилдөөн ширүүсэж, намын удирдлагаа ч дээд шүүхэд бүртгүүлж чадахгүй байдалд хүрээд байгаа. Өнгөрсөн жилийн хугацаанд үргэлжилсэн энэхүү маргааныг эцэслэн 2021 оны 9-р сарын 27-ны өдөр АН-ын үүсгэн байгуулагчдын нэг С.Зоригийн хөшөөний өмнө О.Цогтгэрэл, М.Тулгат болон АН-ын удирдлагууд хамтарсан мэдэгдэл хийн АН-ын “Эв нэгдлийн их хурал”-ыг Их эзэн Чингис хааны мэндэлсэн өдөр буюу 2021 оны 11-р сарын 5-ны өдөр хуралдуулахыг зарласан.

Энэхүү саналыг АН-ын ҮБХ-ны 290 гаруй гишүүд дэмжин гарын үсгээ зурж 2021 оны 10-р сарын 20-ны өдөр ҮБХ хуралдан намын Их хурлыг 2021 оны 11-р сарын 5-нд зарлаж, хуралдааны бэлтгэл ажлыг хангаж ажиллахыг Улс төрийн зөвлөлд даалгасан.

Тэгвэл өнөөдөр буюу 2021 оны 11-р сарын 01-ны өдөр АН-ын Улс төрийн зөвлөл хуралдаж намын ээлжит бус “ОНЦ ИХ ХУРАЛ”-ыг зарлах, хурлын зохион байгуулалтыг хангах ажлын хэсгийг байгуулах шийдвэр гаргалаа.

Ардчилсан намд сүүлийн нэг жилд үүсээд буй хагарал бутрал, хууль бус дүрмийн шийдвэрүүд, олон удаагийн зөрчилдөөнтэй баримт бичгүүд дээд шүүхэд хүргэгдсэн мөн 2020 оны УИХ-ын сонгууль болон 2021 оны Ерөнхийлөгчийн сонгуульд өнгөрсөн 30 жилийн туршид АН-ын түүхэнд байгаагүй ялагдлыг хүлээсэн нь АН-ын хувьд онцгой нөхцөл байдал үүссэн гэж УТЗ үзсэнээр АН-ын “ОНЦ ИХ ХУРАЛ”-ыг 2021-оны 11-р сарын 05, Их эзэн Чингис хааны мэндэлсэн өдөр хуралдуулахаар шийдвэрлэсэн байна.

Өнгөрсөн долоо хоногийн амралтын өдрүүдэд АН-ын анхан шатны нэгж, үүрүүд хуралдан Их хурлын төлөөлөгчдөө сонгосон бөгөөд Монгол орны өнцөг булан бүрээс сонгогдсон АН-ын нийт 1318 төлөөлөгч Улаанбаатар хотноо АН-ын “ОНЦ ИХ ХУРАЛ”-д оролцон, хуралдаж АН-д үүссэн дотоод зөрчлийг эцэслэн шийдвэрлэх болно.