Орон нутаг
Коронавирус: Гашуунсухайтын жолооч Хөвсгөлд тусгаарлагджээ
Хөвсгөл аймагт шинэ төрлийн коронавирусийн халдвар байж болзошгүй нэг сэжигтэй тохиолдол бүртгэгдсэн байна. Энэ талаар Хөвсгөл аймгийн Эрүүл мэндийн газрын дарга Н.Үүрийнбаяраас тодруулахад “Гашуунсухайтад нэгдүгээр сарын 21-28-нд тээврийн жолооч хийж байсан 28 настай иргэн, Улаанбаатараар дамжин Хөвсгөлд ирсэн. Халуурсан гэх шинж тэмдэгтэйгээр манай төвд хандсан. Эрсдэлтэй газраас ирсэн гэдэг утгаар нь тус иргэнийг тусгаарлан сорьц авч ХӨСҮТ-рүү өнөөдөр /2020.2.11/ явуулсан. Шинжилгээний хариу 24-48 цагийн дараа гарна. Томуугийн дэгдэлттэй үе болохоор энэ нь томуу байж ч болно. Гэхдээ болзошгүй байдлаас урьдчилан сэргийлэх үүднээс аймгийн Онцгой комиссоос зах худалдааны төвийг хоёр хоног хааж байгаа. Энэ хугацаанд хаасан газруудад ариутгал халдваргүйтгэл хийх юм” гэлээ.
Мөн шинэ төрлийн коронавирусээс урьдчилан сэргийлэх зорилгоор гуравдугаар сарын 2, 3, 4-нд зохион байгуулах байсан “Хөх сувд-2020” мөсний баярын үйл ажиллагааг зогсоох саналыг аймгийн Онцгой комиссоос гаргасан юм. Энэ шийдвэрийг БОАЖЯ-нд уламжилснаар эцсийн шийдвэр гарах юм.
Хөвсгөл аймгийн Онцгой байдлын хуралдаанаас дараах дөрвөн шийдвэрт хүрсэн байна.
- Шинэ коронавирусийн халдварын болзошгүй эрсдэлээс урьдчилан сэргийлэх, тандалт, эмнэлгийн тусламж үйлчилгээ, хариу арга хэмжээний бэлэн байдалд эрсдэлийн түргэвчилсэн үнэлгээ хийхэд Эрсдэлийн түвшин “Өндөр” үнэлэгдсэн тул идэвхжлийн горимд шилжин ажиллах
- Аймаг сумдад Согтууруулах ундаа худалдах, түүгээр үйлчлэх тусгай зөвшөөрөлтэй үйлчилгээний газар, караоке, баар цэнгээний газруудын үйл ажиллагааг 2020 оны хоёрдугаар сарын 11-ний өдрөөс 2020 оны гуравдугаар сарын 02-ыг хүртэлх хугацаанд түр зогсоох
- Аймгийн төвд коронавирусийн сэжигтэй тохиолдол нэг бүртгэгдэж тусгаарлагдсан тул Мөрөн сумын хэмжээнд үйл ажиллагаа явуулж буй хүн ам олноор цуглардаг хүнс, барааны зах болон “Шинэ мөрөн” худалдаа үйлчилгээний төвүүдийн үйл ажиллагааг 2020 оны хоёр дугаар сарын 11-нээс 2020 оны хоёрдугаар сарын 13-ыг хүртэлх хоёр хоногийн хугацаанд түр зогсоох энэ хугацаанд объектуудад ариутгал халдваргүйтгэл хийлгэх, хог хаягдлаа цэвэрлэх, ил задгай хаяхгүй байх, хориглосон газар, цэг болон нийтийн эзэмшлийн зам талбайд хүнсний бүтээгдэхүүнийг ил задгай худалдаалах, үзэсгэлэн худалдаа гаргах, үйлдвэрлэл үйлчилгээ эрхлэхгүй байх
- Шинэ коронавирусийн халдварын болзошгүй эрсдэлээс урьдчилан сэргийлэх чиглэлээр ажиллаж буй “Шуурхай штаб”-ыг 24 цагаар гаргаж, холбогдох албадын дарга гишүүдэд үүрэг чиглэл өгч, хэвлэл мэдээллийн хэрэгслээр үнэн зөв мэдээлэл өгч ажиллах, эрсдэлийн түвшин нэмэгдэх үед хүний нөөцтэй байх, шинэчилсэн төлөвлөгөө боловсруулж ажиллах, сэжигтэй тохиолдлын нэг дүгээр хавьтлыг илрүүлж, хүн тээвэрлэж байгаа жолооч нар болон Өмнөговь аймгийн Гашуун сухайт, Цагаан хаданд ажиллаж байгаа болон ажиллаж байгаад ирсэн жолооч нарын нарийвчилсан судалгааг гаргах, холбогдох айлуудын орчимд хяналтын пост ажиллуулах, Аймгийн Онцгой комиссын даргын 01 дүгээр албан даалгаврын хэрэгжилтийг эрчимжүүлэн ажиллахыг бүх байгууллагуудын дарга нарт тус тус үүрэг болголоо.
Р.ДУЛАМ