БНХАУ-Д Covid-19-ийн халдварын тархалт эрчимжиж, хоногт 5154 тохиолдол бүртгэгдлээ

БНХАУ-д өдөрт бүртгэгдэх COVID-19-ийн халдварын тохиолдол 5100 давлаа. Халдварын тархалт эрчимжиж байгаагаас 45 сая гаруй хүн хөл хорионд оржээ.

Сүүлийн нэг хоногт батлагдсан тохиолдлуудын 4000 орчим нь ОХУ-тай хил залгаа оршдог Жилинь мужид бүртгэгдсэн учир даваа гарагаас эхлэн тус мужид хөл хорио тогтоожээ. 24 сая гаруй оршин суугч хөл хорионд ороод байна.

Ухань хотод хамгийн анх “коронавирус”-ийн халдварын голомт үүсэх үед л өдөрт бүртгэгдэх халдварын тохиолдол хоёр удаа 5000 давж байв. Сүүлийн хоёр жилд хатуу бодлого баримтлан, COVID-19-ийн халдварын тархалтыг амжилттай барьж ирсэн БНХАУ-ын хувьд энэ нь томоохон сорилт болж байна.

Халдварын тархалт БНХАУ-ын томоохон хотуудад эрчимжиж байгаа нь эдийн засагт нь хүндрэл учруулах эрсдэл үүсгэж байна. Тухайлбал: технологийн зангилаа хот болсон Шэньжэнь хотод COVID-19-ийн халдварын улмаас хатуу хөл хорио тогтоогоод байгаа юм. Үүний улмаас “iPhone” гар утас үйлдвэрлэдэг “Foxconn”-ийн үйл ажиллагаа түр зогсоод байна.

Мөн БНХАУ-ын санхүүгийн төв болох Шанхай хот олон улсын нислэгүүдийн хуваарьт өөрчлөлт оруулахаар төлөвлөжээ. Халдварын тархалт эрчимжээд буй Дунгуань хотын зарим бүсэд үйлдвэрүүдийг түр хаагаад байна.

М.Аминаа