Бидэнтэй нэгд

Дэлхий

Хятад улс Оросыг дэмжвэл ямар үр дагавартайг Жо Байден Ши Жиньпинд анхааруулав

Нийтэлсэн

Баасан гарагийн орой АНУ-ын ерөнхийлөгч Жо Байден, БНХАУ-ын ерөнхийлөгч Ши Жиньпин нар хоёр цаг орчим хугацаанд утсаар ярьжээ.

Тэдний ярианы сэдэв нь Украинд Оросын явуулж буй дайны ажиллагаа байв. “Украинд явуулж буй Оросын эзлэн түрэмгийлэлд Хятад улс материаллаг дэмжлэг үзүүлбэл ямар хортой үр дагаварт хүрч болохыг ерөнхийлөгч тайлбарлалаа” гэж Цагаан ордноос мэдээлжээ.

Уг үр дагавар нь зөвхөн Хятадад төдийгүй, дэлхий нийтэд сөрөг нөлөө үзүүлэхийг энэ үеэр онцолсон байна.

Гэхдээ АНУ-ын ерөнхийлөгч дайныг дуусгах асуудлаар Путинд нөлөөлөх ямар нэг шууд хүсэлтийг Ши Жиньпинд тавиагүйг Цагаан ордон мэдээлжээ.

“Ерөнхийлөгч Хятадын талд ямар нэг тодорхой хүсэлт тавиагүй. Тэр нөхцөл байдлыг яаж дүгнэж байгаагаа болон тодорхой үйлдэл гаргавал ямар үр дагавартайг тайлбарлалаа. Хятад улс шийдвэрээ өөрөө гаргах ёстой гэж бид үзэж байна” гэж Цагаан ордны мэдэгдэлд өгүүлжээ.

Харин Хятадын төрийн мэдээллийн Шиньхуа агентлаг төрийн тэргүүнүүдийн хооронд “илэн далангүй, гүн гүнзгий” яриа болж өнгөрснийг мэдээлсэн ч Украины талаар юу ярьсан тухай дэлгэрүүлээгүй байна.

Украин дахь нөхцөл байдал Хятад улсын хүсэж, төсөөлж байгаагүй хэмжээнд хүрснийг Ши Жиньпин АНУ-ын ерөнхийлөгчид илэрхийлжээ.

Тэр бас дайныг дуусгахад Хятад улс ямар нэг үүрэг гүйцэтгэх санал хэлээгүй байна. “Барын хүзүүнд хонх зүүсэн хүн өөрөө хонхыг салгах ёстой” гэсэн зүйр үгээр АНУ болон НАТО дайн гаргах үндэс суурийг эхэлж тавьсан гэж үзэж байгаагаа Ши Жиньпин илэрхийлсэн тухай Шиньхуа агентлаг мэдээлжээ. Өөрөөр хэлбэл Украиныг НАТО-д элсүүлэхийг оролдсон нь Оросын талтай сөргөлдөх үндсэн шалтгаан болсон гэж үзэж байгаагаа илэрхийлсэн байна.

Хятадын төрийн тэргүүн бас Тайванийн асуудлыг яриандаа хөндсөн тухай Шиньхуа мэдээлжээ. “АНУ дахь зарим хүмүүс Тайванийг тусгаар тогтнуулах зорилготой хүчнийхэнд буруу дохио өгч байгаа нь маш аюултай үйлдэл юм. Хэрвээ Тайванийн асуудлыг зөв зохистой шийдвэрлэхгүй бол хоёр орны харилцаанд ноцтой сөрөг нөлөө үзүүлнэ” гэж Ши Жиньпин анхааруулсан байна.

Баасан гарагийн өглөө Франц, Германы төрийн тэргүүнүүд ОХУ-ын ерөнхийлөгч Владимир Путинтэй утсаар ярилцжээ.

Нэг цаг орчим хугацаанд үргэлжилсэн ярианы үеэр Эммануэл Макрон, Олаф Шольц нар дайны галыг яаралтай зогсоох, Украин дахь хүмүүнлэгийн нөхцөл байдлыг сайжруулах хүсэлт тавьсан ч тодорхой үр дүнд хүрээгүй тухай Парис, Берлиний албан эх сурвалжууд мэдээлсэн байна.

Энэ үеэр Оросын зэвсэгт хүчин энгийн иргэдийн амь насыг эрсдэлд оруулахгүйн тулд бүхнийг хийж байгаа ч Украины тал харгислал үйлдсэн хэвээр байгааг Путин илэрхийлсэн тухай Кремлийн хэвлэлийн алба мэдээлжээ. Мөн Киевийн эрх баригчид яриа хэлэлцээг зориуд удаашруулж, хэрэгжих боломжгүй саналууд тавьж буйг Путин шүүмжилсэн байна.

Баасан гарагт бас НҮБ-ын аюулгүй байдлын зөвлөл хуралдаж, Украины нутаг дэвсгэрт АНУ-ын тусламжтай биологийн зэвсгийн лабораториуд ажиллаж буй талаар Оросын талын гомдлыг сонссон юм.

Хурлын дараа аюулгүй байдлын зөвлөл дэх Их Британийн байнгын төлөөлөгч Барбара Вүүдвард “Энэ талаар ямар нэг нотолгоо олдоогүйг НҮБ тодорхой илэрхийллээ. Анхнаасаа дэмий яриа байсныг бид баталлаа. Үнэнийг хэлэхэд энэ бол цөхрөнгөө барсан хүмүүсийн тарааж буй ташаа мэдээлэл юм. Украин дахь Оросын нөхцөл байдал тийм ч сайнгүй байгаа нь эндээс тодорхой харагдаж байна” гэж мэдэгджээ.

 

Эх сурвалж: The Guardian

CGTN мэдээ10 цаг өмнө

Ээжийн хайр

CGTN мэдээ10 цаг өмнө

“Эхийн сэтгэл”-ийг хүсэрдүүлж үл болно

CGTN мэдээ1 өдөр өмнө

Ши Жиньпин ОХУ-д хийсэн төрийн айлчлалаа өндөрлүүлэв

Дэлхий2 өдөр өмнө

Мартагдашгүй түүхийн улбаа 70 жил

Covid-193 өдөр өмнө

Путин Кремлийн ордонд Ши Жиньпинг цайлав

CGTN мэдээ3 өдөр өмнө

Хятад Орос хамтарсан мэдэгдэл нийтэлж, Хятад-Оросын стратегийн түншлэлийг шинэ шатанд гаргалаа

CGTN мэдээ3 өдөр өмнө

Ши Жиньпин В.Путин нар сэтгүүлчидтэй уулзав

CGTN мэдээ3 өдөр өмнө

 “Хятад орноор аялахуй-2025” арга хэмжээ эхлэв 

CGTN мэдээ3 өдөр өмнө

Ши Жиньпин дарга ОХУ-ын Ерөнхийлөгч Владимир Путинтэй хэлэлцээ хийв

CGTN мэдээ4 өдөр өмнө

Ши Жиньпин онгоцны буудалд хэлэх үгээ бичгээр тараав

CGTN мэдээ4 өдөр өмнө

“Ши Жиньпиний эшлэх дуртай хэлц үг” нэвтрүүлэг Оросын хэвлэлээр цацагдаж эхэллээ

CGTN мэдээ4 өдөр өмнө

Ши Жиньпин Хятад, Оросын хүмүүнлэгийн хамтарсан арга хэмжээнд баярын захидал илгээв

CGTN мэдээ4 өдөр өмнө

Ши Жиньпин ОХУ-ын хэвлэлд гарын үсэгтэй нийтлэл нийтлэв

CGTN мэдээ5 өдөр өмнө

Ши Жиньпиний ОХУ-д хийх айлчлалын утга учрыг гурван одон медалиар өгүүлэх нь

Улс төр6 өдөр өмнө

П.Сайнзориг: Хороо гэх статусыг ашиглахгүй, хотууд хорооллоос бүрдэнэ