Путинтэй ярилцах нь “цагийн гарз” гэж Италийн ерөнхий сайд хэлжээ

Өнгөрсөн Ням гарагт ОХУ-ын ерөнхийлөгч Владимир Путинтэй утсаар ярьсан Италийн ерөнхий сайд Марио Драги үр дүнд сэтгэл дундуур байгаагаа илэрхийлжээ.

“Түүнтэй ярилцах ямар ч үр дүнгүй, зүгээр л цагийн гарз’ гэж хэлж байсан хүмүүсийн зөв болохыг би одоо л ойлгож эхэлж байна” гэж Марио Драги өчигдөр Италийн өдөр тутмын “Ил Корриере делла Сера” сонинд ярьсан байна.

Европын Холбоог төлөөлөн Украины дайныг зогсоохын төлөө Путинтэй яриа хэлэлцээ хийх бүх боломжийг ашиглахыг хичээж буй Францын ерөнхийлөгч Эммануэл Макроны зүтгэлийг Драги өндрөөр үнэлжээ.

“Гэхдээ дайны аймшигт хядлага, хүүхэд, эмэгтэйчүүдийг золиосолж буй үйл явдалд бидний уриалга, утсаар ярьсан яриа ямар ч нөлөөгүй юм байна гэсэн сэтгэгдэл надад төрж байна. Одоогоор Путиний зорилго бол энх тайвныг эрэлхийлэх биш, харин Украины эсэргүүцлийг нухчин дарж, эзлэн түрэмгийлж, өөртөө ашигтай засгийн газрыг байгуулах бололтой” гэж Драги ярьсан байна.

Зеленскийтэй уулзах, гал зогсоох зэрэг санал тавих бүрд Путин “одоо цаг нь биш” хэмээн хариулж байсныг тэр хэлсэн юм.

Италийн ерөнхий сайдаас сэтгүүлч Буча тосгонд үйлдсэн хядлага “дайны гэмт хэрэг” мөн эсэхийг асуухад “Бучагийн аймшгийг дайны гэмт хэрэг гэхгүй бол өөрөөр юу гэж нэрлэх юм бэ?” гэж хариулжээ.

Гэхдээ тэр Оросын армийн үйлдсэн харгислалд “геноцид”, “дайны гэмт хэрэг” зэрэг нэр томьёоны аль нь тохирохыг хуулийн хүрээнд шалгаж тогтоох ёстойг онцолсон байна.

Европын төв банкны ерөнхийлөгч асан Марио Драги 2021 оны хоёрдугаар сард Итали улсын ерөнхий сайдаар томилогдсон юм.

Тэрбээр сүүлийн үед Италийн байгалийн хийн импортыг Оросоос хамаарал багатай болгохын тулд Африкийн орнуудаас нийлүүлэх боломжийг судалж, уг төсөлдөө Европын бусад орнуудыг хамтран ажиллахыг уриалж байгаа.

“Европын Холбооны Москвагийн эсрэг ашиглах гол зэвсэг бол түүний зах зээл юм. Байгалийн хий авахаа багасгах тусам бид Оросын санхүүжилтийг бууруулна” гэж Драги ярьжээ.

Эх сурвалж: Business Insider