Хятад улс КОВИД-19-ийн эсрэг хязгаарлалтаа 3 жилийн дараа зөөлрүүлж буйн шалтгаан

Хятад улс КОВИД-19 цар тахалтай гурван жил тэмцсэний эцэст энэ цар тахлын эсрэг хариу арга хэмжээнүүдээ зөөлрүүлж байна.

Тухайлбал, одоо олон нийтийн газрууд руу нэвтрэхэд PCR буюу ПГУ-ын шинжилгээ шаардахгүй, хөнгөн шинж тэмдэгтэй өвчтөнүүдийг гэрт нь тусгаарладаг болж, өндөр эрсдэлтэй бус бүсүүдэд бизнесийн үйл ажиллагаа явуулах, аялж зорчиход чөлөөтэй болж байна.

Яагаад одоо л?

Эдгээр нь Хятад улс бараг гурван жилийн турш баримталсан “Ковид-Тэг” бодлогодоо томоохон өөрчлөлт хийж буйн илрэл юм.

Тэгвэл тус улс яагаад одоо л өөрчлөлт хийж байна вэ? Гурван жил цар тахалтай тууштай тэмцсэний дүнд нэлээд өөрчлөлт гарсан болохыг тус улсын эрүүл мэндийн мэргэжилтнүүд, шинжээчид хэлж байна.

Нэгдүгээрт, Хятадад одоо бүртгэгдэж буй Омикроны дэд хувилбарууд нь шинж тэмдгийн хувьд өмнөх хувилбаруудтай харьцуулахад харьцангуй хөнгөн байна. Мэргэжилтнүүдийн хэлснээр, эдгээр хувилбар нь илүү хурдан халдварладаг хэдий ч төдийлэн хүндрэл үүсгэхгүй байгаа учир хүмүүсийн эрүүл мэндэд эрсдэл учруулах нь харьцангуй бага ажээ.

Хятадын амьсгалын замын өвчний тэргүүлэх мэргэжилтэн Жун Наньшань баасан гарагт мэдэгдэхдээ, “Омикроны хамгийн сүүлийн үеийн дэд хувилбаруудын халдвар авсан хүмүүс 7-10 хоногт бүрэн эдгэрч буй бөгөөд нас баралтын түвшин ханиад томууныхтай бараг адил түвшинд байна” гэжээ.

Хятадын өмнөд нутгийн Гуанжоу хотод Омикроны сүүлийн давлагааны үеэр 160 мянга гаруй хүн халдвар авсан бөгөөд нэг ч нас баралт бүртгэгдээгүй гэж Гуанжоугийн Анагаах Ухааны Их Сургуулийн захирал Тан Сяопин мэдэгдсэн байна. Түүний хэлснээр, халдвар авсан хүмүүсийн 90 гаруй хувьд нь шинж тэмдэг илрээгүй, эсвэл ялимгүй шинж тэмдэг илэрч байжээ.

Хоёрдугаарт, Хятадын иргэдийн 90 гаруй хувь нь вакцинжуулалтад хамрагдаад буй нь тахлын эсрэг арга хэмжээг зөөлрүүлэхэд нөлөөлсөн гол хүчин зүйлсийн нэг аж. Тус улсын энэ вируст хамгийн эмзэг, өртөмтгий гэгдэж байсан 60-аас дээш насныхны 86.42 хувь нь 11 дүгээр сарын эцсийн байдлаар вакцинжуулалтад бүрэн хамрагдаад байсан байна. Тус улсын засгийн газар вакцинжуулалтад идэвхтэй хамрагдахыг ахмад настнуудад одоо ч уриалсаар байна.

Яагаад эрт зөөлрүүлж болоогүй вэ?

Олон улс орон коронавирустэй зэрэгцэн орших сонголтыг аль эрт хийсэн байхад Хятад улс цар тахлын эсрэг бодлогодоо томоохон өөрчлөлт оруулах гэж яагаад бараг гурван жил хүлээсэн бэ?

Үнэн хэрэгтээ Хятад улс сүүлийн гурван жилийн хугацаанд ерөнхий нөхцөл байдалд үнэлэлт дүгнэлт өгч, Ковид-19 цар тахлын эсрэг бодлогоо илүү нарийвчлалтайгаар, зорилтод түвшинд тохируулан өөрчлөлт оруулсаар ирсэн юм.

Өнгөрсөн гурван жилийн хугацаанд Хятад улс тууштай ажилласны дараа дээр дурьдсан нөхцөл байдлыг бий болгосон тул хамгийн сүүлийн үеийн бодлогын өөрчлөлт нь “Ковид-Тэг” стратегийн үр дүнгийн нэг хэсэг гэж тус улсын эрүүл мэндийн албаныхан үзэж байна.

2019 оны сүүлчээр Ухань хотод коронавирус дэгдэх үед энэ вирусийн хор хөнөөл одоогийнхтой харьцуулахад харьцангуй их байсан. Тухайн үед Хятад улсын Засгийн газар шийдэмгий бөгөөд зоригтой шийдвэр гарган тус хот руу орох, гарах хөдөлгөөнийг хааж байсан билээ. Ингэснээр Уханьд вирусийн тархалтыг гурван сарын дотор дарж, улсынхаа бусад хэсэг рүү тархахаас сэргийлж чадсан юм.

Үүний дараа тус улс 1.4 тэрбум хүн амынхаа амь нас, эрүүл мэндийг хамгаалах зорилгоор “Ковид-Тэг” стратегийг хэрэгжүүлснээр орон нутгийн 100 гаруй тархалтыг хурдан шуурхай хязгаарлаж чаджээ.

Мөн тус улсын Засгийн газар сүргийн дархлаа тогтоохын тулд вакцинжуулалтын хөдөлгөөнийг улс орон даяараа өрнүүлж эхэлсэн нь олон хүний амь насыг аварч, олон өвчтөний биеийн байдал хүндрэхээс урьдчилан сэргийлж чадсан юм.

Цар тахлын эсрэг тууштай тэмцсэний дүнд дэлхийн хамгийн олон хүн амтай тус улс нас баралтын тоог 5,235-д барьж чадсан байна.

Коронавирус нь Альфагаас Бета, Делта, одоогийн Омикрон хувилбар хүртэл байнга мутацид орсоор ирсэн бөгөөд үүнийг ч дагаад дэлхий даяар нас баралтын түвшин буурсаар иржээ. Гэхдээ энэ нь сүүлийн гурван жилийн хугацаанд аажим аажмаар явагдсан процесс юм.

ДЭМБ-ын мэдэгдсэнээр, өнгөрсөн хугацаанд энэ цар тахлын улмаас дэлхийн хэмжээнд нийт 6.62 сая гаруй хүн амь насаа алдаж, халдварын тохиолдлын тоо 642 сая давсан байна.

Эрүүл мэндийн салбарын хөгжил, нөөц хангамжаар дэлхийд тэргүүлдэг АНУ-д л гэхэд энэ вирусийн улмаас 1.09 гаруй хүн амь насаа алдаж, бараг 100 сая хүн халдвар авчээ.

Хэрвээ АНУ-аас дөрөв дахин олон хүн амтай, эрүүл мэндийн дэд бүтэц тааруу Хятад улс АНУ-тай адил аль эрт Ковид-19-ийн эсрэг бодлогоо зөөлрүүлчихсэн бол юу тохиолдохыг төсөөлөхөд ч бэрх. Хэрэв тэгсэн бол хэдэн сая хүний амь нас эрсдэлд орох байсан юм.

Ковидын өвчлөл, нас баралт хамгийн бага

Хятад улс нь томоохон орнууд дотроо Ковидын өвчлөл, нас баралтын түвшин хамгийн бага орон болж байна.

11 дүгээр сарын 28-ны байдлаар, Хятадад коронавирусийн тархалтын түвшин болон дэлхийн дунджийн харьцаа 1/374, Хятад болон АНУ-ын тархалтын түвшний харьцаа 1/1348 байсан бол Хятадын нас баралтын түвшин болон дэлхийн дунджийн харьцаа 1/232 байв.

Албан ёсны статистик мэдээнд дурдсанаар, тус улсын хүн амын дундаж наслалт 2019 онд 77.4 байсан бол 2020 онд 77.93, 2021 онд 78.2 жил болж нэмэгджээ. Хятадын Засгийн газар энэ цар тахалтай тэмцэх бодлогыг боловсруулж хэрэгжүүлэхдээ ард иргэдийнхээ амь нас, эрүүл мэндийг эн тэргүүнд тавьсан учир ийм үр дүнд хүрсэн гэж мэргэжилтнүүд үзэж байна.

Эх сурвалж: CGTN