Э.Цолмон: Хүүхдээ улирлын амралтаар нь томуугийн вакцинд хамруулж чадвал томуугийн өвчлөлөөс сэргийлэх хамгийн үр дүнтэй арга болно

2022-2023 оны улирлын томуугийн вакцин болон томуу, томуу төст өвчний өвчлөл хэр их байгаа талаар Интермед эмнэлгийн Дархлаажуулалт хариуцсан халдварын эмч Э.Цолмонгоос тодрууллаа.

– Томуу, томуу төст өвчний өвчлөл энэ жил ямар түвшинд байна вэ? 

– Томуу бол вирусээр үүсгэгддэг бөгөөд хүн амын эрүүл мэнд, амь нас, цаашлаад нийгэмд хүртэл сөрөг нөлөө үзүүлдэг халдварт өвчин юм. 9-10 дугаар сараас эхлээд 3-4 дүгээр сар хүртэл дэгдэлт хэлбэрээр гардаг халдварт өвчин.

Томуу өвчинтэй холбоотойгоор олон судалгаа гарсан байдаг. Тухайлбал, ДЭМБ-ын судалгаагаар тухайн жилийн хэмжээнд дэлхий даяар 3-5 сая хүн амьсгалын замын томуу, томуу төст өвчнөөр өвчилдөг гэж гарсан. Үүний дотроос нас баралтын хувьд 290-670 мянга буюу өвчлөлтэй холбоотой их нас баралт бүртгэгдсэн тоон судалгаа байна.

А хүрээний H1N1 вирусийн халдвар дэлхий нийтийн хэмжээнд хамгийн өндөр байна. Дэлхий даяар 151,700 – 575,400 хүн энэ вирусийн халдвараар нас барсан гэх тооцооллыг АНУ-ын Өвчний хяналт сэргийлэлтийн төвөөс гаргасан. Тэгэхээр өвчлөл, нас баралтын хувьд маш өндөр байгаа.

– Монгол Улсын хувьд ямар байна вэ? 

– Томуу, томуу төст өвчний үүсгэгчүүдийн хувьд А хүрээний вирус Монгол Улсад дэгдээд байгаа юм.

Түүнчлэн Монгол Улсын Томуугийн үндэсний төвийн мэдээлэл долоо хоног бүр гардаг. Сүүлийн буюу 52 дахь долоо хоногийн мэдээллээр манай улсын хүн амын дунд А хүрээний H1N1 вирусийн халдвар, А хүрээний H3N2 вирусийн халдвар болон В хүрээний вирусийн халдвар хүн амын дунд дэгдэлт хэлбэрээр гарсан, эргэлтэд байгааг хэлсэн.

Энэ халдварын өвчлөлөөр эмнэлэгт хэвтэж байгаа нийт хүүхдийн 30-аас дээш хувь нь томуугийн вирусийн халдвараар хүндэрч, хэвтэн эмчлүүлж байна. Иймээс өвчлөл, нас баралт өндөртэй байгаа вирусийн халдварын эсрэг хамгийн үр дүнтэй арга бол дархлаажуулалт юм. Манай орны хувьд сүүлийн жилүүдэд харьцангуй идэвхтэй хамрагдах болсон.

ДЭМБ-ын зөвлөснөөр тухайн жилдээ тухайн дэгдэлт хэлбэрээр гарах магадлалтай вирусийн омгуудыг оруулсан вирусийн вакцин хийх зөвлөмж олгодог.

– Тус вакцины хийгдэх тунгийн хувьд ямар байх вэ?

– Нэг хүнд нэг тун вакцин хийнэ. Томуугийн вакцин огт хийлгэж байгаагүй бөгөөд томуугийн халдвараар өвчилж байгаагүй 9-өөс доош насны хүүхдэд хоёр дахь тунг дөрвөн долоо хоногийн зайтай хийнэ.

“ХОС ЦАР ТАХЛААС УРЬДЧИЛАН СЭРГИЙЛЭХ ХАМГИЙН ҮР ДҮНТЭЙ АРГА НЬ ТОМУУГИЙН ВАКЦИН”

– Вакцин хийлгэснээс хойш хэр хугацааны дараа хүний биед дархлаа бүрэн тогтдог вэ?

– “GC FLU 4 ЦЭНТ” вакцины хувьд хийлгэснээс хойш 14-өөс дээш хоногт бүрэн дархлаа тогтож эхэлнэ.

Манай орны хувьд хүйтний эрч чангарч байна. Мөн эцэг, эхчүүд хүүхдээ сурагчдын улирлын амралтаар нь томуугийн вакцинд хамруулж чадвал томуугийн өвчлөлөөс сэргийлэх хамгийн үр дүнтэй арга болно гэж хэлмээр байна. Яагаад гэвэл гэртээ байх хугацаандаа вакциндаа хамрагдчихвал сургуулийн орчинд орох үед бүрэн дархлаа тогтчихсон, дэгдэлтэд байгаа вирусээр өвчлөхгүй, өвчилсөн ч хүндрэхгүй.

Түүнчлэн удахгүй Монголын уламжлалт Цагаан сар болж олон нийттэй харилцаанд их ордог үе ирэх учраас вакцинд хамрагдах нь их чухал.

– Дархлаажуулалтад хэн хамрагдаж болох вэ?

– Зургаан сараас дээш насны бүх хүн хийлгэж болно. Ялангуяа бага насны хүүхэд, жирэмсэн болон хөхүүл ээжүүд, өндөр настан, архаг хууч өвчтэй хүмүүс томуу, томуу төст өвчнөөр хүнд өвддөг тул дархлаажуулалтаар урьдчилан сэргийлэх арга хэмжээ авахыг зөвлөж байна.

Томуугийн үндэсний төвөөс хэлэхдээ манай орны хувьд томуугийн өвчлөл нь идэвхжилтийн түвшинд хүрсэн гэдгийг хэлсэн. Дээрээс нь томуу, томуу төст өвчний томоохон давлагаа илрэх магадлалтай. Мөн цар тахлын шинэ давлагаа нэмэгдэж, хос цар тахал хэлбэрээр идэвхжих магадлал өндөр байгааг ДЭМБ, Монгол Улсын Томуугийн үндэсний төвөөс сэрэмжлүүлж, зөвлөмж хүргэж байгаа.

Тиймээс хос цар тахлаас урьдчилан сэргийлэх хамгийн үр дүнтэй арга нь томуугийн эсрэг вакцин гэдгийг хэлэх нь зүйтэй. Энэ жилийн хувьд өвчлөлийн хувьд хүндрэлийн хувьд өндөр байна. Манай эмнэлгийн хүүхдийн тасаг бас ачаалалтай ихтэй ажиллаж байгаа.

– Томуугийн вакцины эсрэг заалт нь юу вэ, мөн танай эмнэлгийн хувьд томуугийн вакцин хэдэн төгрөгийн үнэтэй байгаа вэ? 

– Өндөг, тахианы махны харшилтай. Өмнө нь вакцин, био бэлдмэлээс харшилж байсан. КОВИД-19 халдвар батлагдсанаас хойш 21-30 хоногийн дараа томуугийн вакцинд хамрагдана. Томуугийн вакцин 20% хямдраад, 52,000 төгрөг болсон байгаа.