Египетийн шүүх нэг өдөр 38 хүнд бүх насаар нь хорих ял оноов

Ням гарагт Египет улсын шүүх 2019 онд тус улсад гарсан засгийн газрын эсрэг жагсаал тэмцэлд оролцсон 38 хүнд бүх насаар нь хорих ял оноожээ.

Ерөнхийлөгч Абдел Фаттах эл-Сисси улс орноо хатуу гараар удирддаг тул эрх баригчдын эсрэг жагсаал цуглаан ховор гардаг.

Харин Испанид амьдардаг бизнесмэн Мохамед Али улс төрчдийн авлига, хууль бус үйлдлийн тухай дүрс бичлэгүүдийг сошиал сүлжээнд тараасны дараа 2019 оны есдүгээр сард засгийн газрын эсрэг томоохон тэмцэл гарч байжээ.

Өчигдөр ял сонссон 38 хүний 23 нь Египетэд байхгүй тул эчнээ ял оноосон байна. Тэдгээрийн дотор тэмцлийг өдөөсөн Мохаммед Али багтжээ.

Шүүх өчигдөр бас энэ хэрэгтэй холбогдуулан 44 хүнд 5-15 жилийн хорих ял оноосны дотор хүүхдүүд байсан байна.

Үүнээс гадна шалгагдаж байсан өөр 21 хүний гэм буруугүйг тогтоож, цагаатгажээ.

2019 оны тэмцэл Египетийн боомт хот Суэцээс анх эхэлж байв. Тухайн үед эрх баригчид нийслэл Кайр болон бусад хотуудаас олон зуун хүнийг баривчилж байжээ.

Египетийн эрх баригчид иргэдийг бөөнд нь шүүж, ял оноох тохиолдол түгээмэл гардаг. Ингэхдээ гэмгүй нэгнийг хэлмэгдүүлэх боломжтой тул хүний эрхийн байгууллагууд үүнийг нь шүүмжилдэг ч өөрчлөгдөхгүй байгаа юм.

Египетийн засгийн газар сүүлийн жилүүдэд олон мянган хүнийг бөөнөөр нь ялласны дотор голдуу исламын экстремистүүд, 2011 оны Арабын хувьсгалын идэвхтнүүд байжээ.

Эх сурвалж: Associated Press