Б.Энхбаяр: Зээлтэй холбоотой асуух зүйл байсан ч сайд асан З.Мэндсайхан сонсголд ирсэнгүй

Хөгжлийн Банкны гурав дахь шатны өнөөдрийн сонсголд “Хүнсний улаан буудайн нөөц бүрдүүлэх төсөл 2021” зээлийн асуудлыг хэлэлцэж байна.

Энэхүү зээлтэй холбогдуулан гурван хүнийг гэрчээр дууджээ. ХХААХҮ-ийн сайд асан З.Мэндсайхан, “Дорнод гурил” компанийн захирал Д.Өлзийбаяр, “Өег гурил” компанийн захирлыг дуудсан ч бие төлөөлөгчөө оролцуулж, З.Мэндсайхан, Д.Өлзийбаяр нар ирж чадахгүй гэдгээ мэдэгдсэн байна.

Шинжээч дүгнэлтдээ:

Засгийн газрын 2020 оны 180 дугаар тогтоолоор Хүнсний хомсдол үүсэх, үнэ өсөхөөс урьдчилан сэргийлэх, хангамжийг тогтворжуулах, аюулгүй байдлын нөөц бүрдүүлэх зорилгоор хүнсний улаан буудайг импортлоход шаардагдах 100 тэрбум төгрөгийн санхүүжилтийг Хөгжлийн Банкны эх үүсвэрээр олгохоор болжээ.

Хөтөлбөрт хамрагдсан ААН-үүдээс

• “Од групп” ХХК 64.08 хувь
• “Хангай миллс” ХХК 80 хувь
• “Ерэн цагаан” ХХК 42.56 хувь
• “Дорнод гурил” ХХК 99.67 хувийн гүйцэтгэлтэйгээр хүнсний улаан буудайг импортолсон.

Түүнчлэн хөтөлбөрийн хүрээнд 2021 онд арилжааны гурван банктай “Дамжуулан зээлдүүлэх гэрээ” байгуулан таван дэд төсөлд 20.1 тэрбум төгрөгийн санхүүжилтийг олгосон нь хугацаандаа бүрэн төлөгдсөн болохыг хэлэв.

Шинжээчийн дүгнэлтийн дараа Түр хорооны дарга, УИХ-ын гишүүн Б.Энхбаяр “Сайд асан З.Мэндсайханаас асуулт асуух гэсэн боловч ирсэнгүй. Энэ зээл дээр “Өег гурил” компани 4.5 тэрбум төгрөгийг гадаад биш дотоод компаниуд руу шилжүүлсэн гүйлгээ хийгдсэнийг шинжээч хэлсэн. Гэрчүүд ирээгүй учир дараагийн асуудлаа хэлэлцье” хэмээв.