Сумны нийлүүлэлтийг нэмэгдүүлэх амлалт авсны дараа Вагнер групп Бахмут хотод үргэлжлүүлэн тулалдахаар болов

Өнгөрсөн долоо хоногийн сүүлээр Оросын хувийн зэвсэгт хүчний Вагнер группийн тэргүүн Евгений Пригожин их бууны сумны нийлүүлэлт муу байгааг хурцаар шүүмжилж, нийлүүлэлтээ нэмэгдүүлэхгүй бол Лхагва гарагт Бахмутаас цэргээ татахаар ОХУ-ын батлан хамгаалах яамыг сүрдүүлж байсан юм.

Тэгвэл энэ сүрдүүлгийн дараа батлан хамгаалах яамны удирдлага сумны нийлүүлэлтийг сайжруулах амлалт өгсөн тухай тэр Ням гарагт мэдээлжээ.

“Тулалдаанаа үргэлжлүүлэхэд шаардлагатай сум, зэр зэвсгийн хангамжийг эрс нэмэгдүүлэх амлалтыг бидэнд өглөө” гэж Пригожин хувийн Телеграм хуудсандаа мэдээлсэн байна.

Вагнер групп болон Оросын албан ёсны армийн ажиллагааны уялдаа холбоог генерал Сергей Суровикин зохицуулж байгааг тэр бас хэлжээ.

Түүнийг “Дайн тулааны талаар ойлголттой цорын ганц генерал цолтон” гэж Пригожин магтсан байна.

Харин сум, зэр зэвсгийн нийлүүлэлтийн талаар Кремлийн эрх баригчид ямар нэг мэдээлэл өгөөгүй юм.

Өчигдрийн мэдэгдлээс өмнө Бахмут дахь Вагнерын ангиудын байрлалыг Лхагва гарагаас эхлэн Чеченийн Рамзан Кадыровын цэргүүд авч үлдэх тухай яриа тараад байв.

Харин сумны нийлүүлэлтийг нэмэгдүүлэхээр болсны дараа яах нь тодорхойгүй байна.

Тайван цагт 70,000 орчим оршин суугчтай байсан Донецк мужийн Бахмут хот сүүлийн 10 орчим сарын турш Украины дайны хамгийн том тулааны талбар болоод байгаа.

Хотын 95 хувь Вагнерын хяналтад байгаа гэж Оросын хэвлэлүүд мэдээлж байна.

Бахмутыг оролцуулаад Украины дорнод фронт дээр нөхцөл байдал маш хүнд байгаа ч хяналтаа алдаагүйг Украины хуурай замын хүчний командлагч Олександр Сирьский өчигдөр мэдэгджээ.

Ням гарагт Их Британийн батлан хамгаалах яам Украины дайны талаарх ээлжит тагнуулын тайландаа Оросын ажиллах хүчний хомсдолын талаар мэдээлсэн байна.

Уг мэдээлэлд өгүүлснээр сүүлийн гурван жилийн хугацаанд Оросын хүн ам хоёр сая орчмоор буурсан нь төсөөлж байснаас өндөр үзүүлэлт гэнэ.

“Цэргийн дайчилгаа, дүрвэлт, хүн амын хөгшрөлт ажиллах хүчний нийлүүлэлтийг хязгаарлаж байна” гэж уг тайланд дурджээ.

Зөвхөн 2022 онд голдуу өндөр боловсролтой, нарийн мэргэжил эзэмшсэн 1.3 сая хүн Оросоос дүрвэсэн байна. Тухайлбал мэдээллийн технологийн салбарын ажиллах хүчний 10 хувь буюу 100,000 орчим мэргэжилтэн 2022 онд ОХУ-аас дүрвэсэн тухай дээрх тайланд өгүүлжээ.

Эх сурвалж: Reuters