Hermès Birkin брэндийн гар цүнхийг бүтээхэд хүргэсэн Францын домогт жүжигчин эмэгтэй 76 насандаа таалал төгсөв

Англи-Францын домогт дуучин, жүжигчин, загвар өмсөгч Жэйн Биркин 76 насандаа таалал төгсжээ.

Англид төрсөн тэрбээр 1970-аад оны үед Францад суурьшиж, франц хэлээр дуулсан дуунуудаараа дэлхий дахинд алдаршиж байв. Мөн Францын найруулагч нарын хэд хэдэн кинонд тоглосон юм.

Биркин нь өөрөөсөө 18 насаар ах алдартай хөгжмийн зохиолч Сэрж Гэнсбуртэй 12 жил хамтран амьдарч, уран бүтээлүүдээ туурвиж байжээ.

Салсныхаа дараа ч тэд найзууд хэвээр үлдэж, Биркинд зориулсан дуунуудыг Сэрж зохиосоор байсан юм.

Тэдний дундаас төрсөн охин Шарлот Гэнсбур мөн алдартай дуучин, жүжигчин болсон байна.

1968 онд Биркин, Сэрж нар “Je t’aime…moi non plus” дууг хамтран дуулсан нь дэлхий дахинд алдаршиж байлаа. Энэ дууг анх Сэрж өмнөх найз бүсгүй Брижит Бардод зориулж бичсэн юм байна.

Үг нь хэтэрхий задгай агуулгатай гэсэн шалтгаанаар уг дууг хэд хэдэн орны радиогоор цацахыг хориглож, Ватиканы эрх баригчид шүүмжилж байжээ.

1984 онд Францын тансаг эдлэлийн Hermès компани Биркиний нэрээр нэрлэгдсэн Birkin брэндийн гар цүнхээ зах зээлд танилцуулсан байна.

Air France компанийн нисэх онгоцонд Hermès компанийн гүйцэтгэх захирал Жан Луй Дюматай санамсаргүй зэрэгцэж суусан Биркиний цүнх задарч, доторх эд зүйлс нь асгарч байжээ.

Ээжүүдэд зориулсан багтаамж сайтай том цүнх зах зээлд дутагдаж байгааг эндээс ойлгосон Дюмас тэр дор нь тэгш өнцөгт хэлбэртэй гар цүнхний загвараа гаргасан байна.

Өнөөдөр Birkin брэндийн гар цүнх хэдэн арван мянган доллароор үнэлэгдэж, худалдаж авахын тулд хэдэн сарын өмнө захиалах хэрэгтэй болдог.

Францын ерөнхийлөгч Эммануэл Макрон талийгаачийг “Францын бэлгэдэл” гэж өргөмжлөөд “биднийг хэзээ ч орхихгүй аялгуу, дүрслэлийг өвлүүлж үлдээсэн жинхэнэ уран бүтээлч” хэмээн магтжээ.