1934 онд хэвлэгдсэн $10,000-тын дэвсгэрт $480,000-ын үнэ хүрчээ

1934 онд АНУ-ын сангийн яамнаас хэвлэсэн $10,000-тын дэвсгэрт өнгөрсөн долоо хоногт болсон дуудлага худалдаанд $480,000-аар зарагджээ.

Дэвсгэрт гүйлгээнд ашиглагдаж байгаагүй, бараг шинээрээ байсан нь ийм өндөр үнэ хүрэх шалтгаан болсон байна.

2022 оны тавдугаар сард ижил чанартай ч серийн дугаар нь онцгой биш ийм дэвсгэрт $300,000-аар зарагдаж байжээ.

1934 оны $10,000-тын дэвсгэртийн өмнөх хамгийн өндөр үнэ хүрсэн тохиолдол 2020 оны есдүгээр сард $384,000 болж байсан юм.

“Том дэвсгэртүүд нь цуглуулагчдын сонирхлыг үргэлж татсаар ирсэн түүхийн ховор дурсгал юм” гэж дуудлага худалдааг зохион байгуулсан Herritage Auction байгууллагын төлөөлөгч Дастин Жонстон онцолжээ.

АНУ-ын сангийн яам 19 дүгээр зуун болон 20 дугаар зууны эхээр $500, $1,000, $10,000-тын дэвсгэртүүд хэвлэдэг байсан ч сүүлдээ хэрэгцээ нь багассан тул 1969 онд гүйлгээнээс татаж байсан гэдэг.

1934 онд $100,000-тын дэвсгэрт хэвлэсэн нь АНУ-ын түүхэнд хамгийн том дэвсгэрт юм. Гэхдээ үүнийг Холбооны Нөөцийн Банк болон засгийн газрын бусад байгууллагуудын хоорондын гүйлгээнд зөвхөн ашигладаг байсан гэнэ.

Өнөөдөр америк долларын хамгийн том дэвсгэрт нь АНУ-ыг үүсгэн байгуулсан хүмүүсийн нэг Бенжамин Фрэнклиний хөрөг бүхий 100-тын дэвсгэрт юм.

2009 оны байдлаар $10,000-тын 336 ширхэг, $5,000-тын 342 ширхэг, $1,000-тын 165,362 ширхэг дэвсгэрт бүрэн бүтэн үлдсэн нь тогтоогдож байжээ.

Эх сурвалж: Business Insider