Таван охинтой малчин: Хүүхэд хүчирхийлсэн этгээдийг хэзээ ч өршөөдөггүй хуультай болмоор байна

Эцэг эхчүүдийн төлөөллүүд “Хүүхдийн эсрэг үйлдсэн гэмт хэрэг”-т ялын бодлогыг чангатгах хууль яаралтай батлах талаар УИХ, Засгийн газарт шаардлага хүргүүллээ.

Хүүхдийн эсрэг гэмт хэрэг үйлдсэн этгээдэд оноох хуулийг чангатгахыг Хууль зүйн сайдаас шаардлаа.

“Далд хүн” хүний эрхийн ТББ-ын тэргүүн Б.Ууганбаяр:

Гэмт хэрэгтний ялыг нь багасгаад буй үзэгдлийг таслан зогсоох, ялангуяа бага насны хүүхэд хүчирхийлсэн, онц хэрцгийгээр хөнөөсөн бол ялыг чангатгах, хөнгөлөхгүй байх хэрэгтэй байна. Нөгөөтээгүүр хуулийн хэрэгжилтэд тавих хяналтаа сайжруулаач. Хууль зүй дотоод хэргийн яамны шинэ сайд Б.Энхбаяртай уулзана, удахгүй өргөн барих хуулийн төсөлд нь саналаа өгнө. Би гурван охинтой. Охин гэлтгүй хүүхэдтэй хүн бүр өнөөдөр маш их айдастай байна.

Баянхонгор аймгийн иргэн, 5 охинтой аав:
– Би Баянхонгор аймгийн харьяат, таван охинтой, нэг хүүтэй малчин хүн. Манай Галуут сумын иргэн 2021 онд хүүхдээ хүчирхийлээд сая 2023 онд шүүх хурлаар 15 жилийн ял авсан. энэ хэрэг дээр ажиллаж байсан прокурор, шүүгч нь авлига авсан. Би энэ талаар шүгэл үлээж сахилгын хороонд мэдэгдсэн. Гэтэл тэр сахилгын хорооны дарга нь тэр хэрэг дээр ажилласан шүүгчтэй дунд сургуулийн найзууд байсан. Гомдлыг маань шийдэхгүй харин ч эсрэгээрээ шүүгчээ хамгаалаад өнгөрсөн. Одоо миний цүнхэнд хууль зөрчсөн байгууллага, шүүгч, прокуруудын мэдээлэл, баримт байна. Хууль хэрэгжсэн бол тэр охин өнөөдөр амьд байх байсан. Энэ төрлийн гэмт хэрэгтэнд 25 жилийн ял өгөөч ээ.

Гэмт хэрэг хийсэн хүний мэдээлэл, зураг хөргийг нь ил болгох хэрэгтэй. Зарим хүний эрх хамгаалагч гэх хүмүүс үүнийг эсэргүүцэж буйг хараад гайхсан. Мөн хүүхэд хүчирхийлсэн хүнийг хэзээ ч өршөөхгүй, хугацаанаас өмнө магадлангаар гаргахгүй байхыг хуульчлах хэрэгтэй байна гэв.