Франц улсад хар тамхины гэмт хэрэгтнийг замаас нь оргуулсан зэвсэгт халдлага гарав

Мягмар гарагт Франц улсын хойд бүс нутагт хар тамхины гэмт хэрэгтнийг тээвэрлэж явсан автомашин зэвсэгт халдлагад өртөх үеэр шоронгийн хоёр хуяг алагдаж, гурван хуяг хүнд шархаджээ.

Халдлага үйлдсэн зэвсэгт этгээдүүд “Ялаа” хочит хар тамхины наймаачин Мохамед Амраг энэ үеэр оргуулсан байна.

30 настай тэрбээр тавдугаар сарын 10-ны өдөр Эвре хотын шүүхээс хулгайн хэрэгтээ ял сонсоод Вал де Ройлын шоронд хоригдож байжээ.

Амра нь Марсель хотын “Харууд” нэртэй гэмт хэргийн бүлэглэлтэй хэлхээ холбоотой, хар тамхины томоохон наймаачин юм байна.

Хяналтын камерын бичлэгээс зэвсэгт этгээдүүд шоронгийн автомашины урдаас жижиг суудлын автомашинаар мөргөж зогсоосон нь харагдаж байгаа юм.

Францын дотоод хэргийн сайд Жеральд Дарманин оргосон ялтныг эрэн сурвалжлах томоохон ажиллагаа эхлүүлснийг мэдээлжээ.

“Гэмт хэрэгтнүүдийг эрэн сурвалжлах ажиллагаанд бүх арга техникийг ашиглаж байна. Миний тушаалаар хэдэн зуун цагдаагийн албан хаагч дайчлагдлаа” гэж тэр Х хуудсандаа бичсэн байна.

Амраг мөрдөгчидтэй уулзуулахаар Роуэн хот руу тээвэрлэх замд халдлага гарсныг Францын хууль зүйн сайд Эрик Дюпон-Моретти мэдээлжээ.

Шархадсан хоёр хуягийн биеийн байдал хүнд байгааг бас мэдээлсэн байна.

“Энэхүү жигшүүрт хэргийн захиалагчдыг олохын тулд бид бүх зүйлийг хийх болно. Тэд бол хүний амийг огт үнэлдэггүй хүмүүс юм. Тэднийг баривчилж, үйлдсэн хэргийнх нь шийтгэлийг хүлээлгэх болно” гэж сайд BFM телевизээр ярьжээ.

Европ тив сүүлийн жилүүдэд кокаин төрлийн хар тамхины дэлхийн хамгийн том зах зээл болоод байгаа.

Үүний улмаас зохион байгуулалттай гэмт хэрэг, аллага хүчирхийлэл хурдтай нэмэгдэж байна.

“Энэхүү халдлага нь зохион байгуулалттай гэмт хэрэгтнүүдийн аюул занал терроризмоос ялгаагүй том болсныг харуулж байна. Бид үүнтэй ижил түвшинд тэмцэх ёстой” гэж Европын Холбооны дотоод хэргийн комиссар Илва Йоханссон сошиал хуудсандаа бичжээ.

Франц улсын хувьд Марсель боомт хот хар тамхины гэмт хэргийн гол төв болоод байгаа юм.

Тус улсын шоронгийн ажилтнуудын үйлдвэрчний эвлэл амиа алдсан мэргэжил нэгтнүүдийнхээ дурсгалыг хүндэтгэн Францын шоронгуудыг нэг өдөр хаахыг эрх баригчдад уриалжээ.

Тэд бас шоронгуудын ачаалал, аюулгүй байдлын асуудлаар хууль зүйн яамтай яаралтай уулзах төлөвлөгөөтэй байгаагаа зарласан байна.

Эх сурвалж: Reuters