“Ойгон” нуурт живсэн 104 үхрийн сэг зэмийг гаргажээ

Завхан аймгийн Түдэвтэй  сумын Ойгон багийн “Ойгон нуурт”  өнгөрсөн арваннэгдүгээр сард живсэн үхрийн сэг зэмийг нуурааас гаргах ажлыг аймгийн Онцгой байдлын газры алба хаагчид, сумын иргэдтэй хамтран зохион байгууллаа.

Тодруулбал, Түдэвтэй сумын нутгаар өнгөрсөн оны арвандүгээр сарын 15,16-ны өдрүүдэд болсон цасан шуурганы үеэр “Ойгон нуур”-ын цөс цөмрөн 10 өрхийн 143 үхэр унаж  хорогдсон. Үхрийн сэг зэмийг нуураас гаргах ажиллагааг цаг агаарын нөхцөл байдлаас шалтгаалан тодорхой хугацаагаар хойшлуулаад байсан юм.

Нуур хамгийн гүндээ 8 метр, 18 км урт юм

Тэгвэл энэ сарын 10-16-ны өдрүүдэд Онцгой байдлын газрын дарга, хурандаа Ө.Болдоор ахлуулсан  “Ажлын хэсэг”  нуурын 40-85 см мөсийг зүсэж, 97 цооног гарган 104 үхрийн сэг зэмийг 20 автомашин багаж хэрэгслийн тусламжтайгаар гаргаж, цэвэрлэлээ.

Үхрийн сэг зэмийг  нуурын захаас 12 км газар зөөвөрлөн нүх ухаж булж устгасан байна.  Тус нуур нь 18 км урт, 8 км өргөн, нийт 61 км² талбай бүхий 0.2060 км³ ус агуулдаг. Хамгийн гүндээ 8 метр, хөвөөний төвшин 1664 м юм гэж Завхан аймгийн Онцгой байдлын газраас мэдээллээ.