Хөгжлийн бэрхшээлтэй хүүхдүүдийн 78.9 хувь нь боловсрол эзэмшиж байна

УИХ-ын Боловсрол, шинжлэх ухаан, соёл, спортын байнгын хорооны 2024.12.18-ны өдрийн хуралдаанаар боловсролын салбарын эрх зүйн орчин шинэчлэгдсэнтэй холбогдуулан авч хэрэгжүүлж байгаа арга хэмжээний ерөнхий мэдээлэл, түүнчлэн боловсролын сургалтын хөтөлбөрийн шинэчлэлийн талаарх Боловсролын сайдын мэдээллийг сонсов.

Боловсролын сайд П.Наранбаяр, Боловсролын засаглал, удирдлагыг илүү мэргэшсэн, бодлогын тогтвортой хэрэгжилтийг хангах, олон талын оролцоог хангах зорилгоор үндэсний болон мэргэжлийн зөвлөлийг байгуулсан тухай танилцуулаад тэгш хамруулах сургалтын үр дүнд Монгол Улсын болон гадаад оронд сүм хийдэд шавилан сууж буй 500 гаруй хүүхдүүдийг нийслэлийн ерөнхий боловсролын 112 дугаар сургуульд төвлөрүүлэн ерөнхий боловсрол эзэмшүүлэх шийдвэрийг гаргаж, сургалтын төлөвлөгөө, хөтөлбөрт тохируулга хийсэн. Эрх нь хязгаарлагдсан залуучууд анх удаа элсэлтийн шалгалт өгч, дээд боловсролын сургалтын байгууллагад элсэн цахимаар суралцаж байна. Хөгжлийн бэрхшээлтэй 2-18 насны хүүхдийн 78.9 хувь нь сургуулийн өмнөх, ерөнхий боловсролд хамрагдаж байна. Түүнчлэн сургуулийн өмнөх болон ерөнхий боловсролын тухай хуульд заасны дагуу энэ хичээлийн жилд суралцагчийн эрүүл мэндийн үзлэгийг Эрүүл мэндийн яамтай хамтран зохион байгуулж, 6 настнуудыг эрүүл мэндийн урьдчилан сэргийлэх үзлэг, оношилгоонд хамрууллаа гэв. Мөн тэрбээр  Боловсролын багц хуулийн хамгийн чухал шинэчлэлийн нэг болох “Багшийн 3 тулгуурт бодлого”-ыг хэрэгжилтийн талаар онцоллоо. Түүний дараа боловсролын цахим шилжилт, санхүүжилтийн болон үнэлгээний шинэчлэлийг хэрхэн хэрэгжүүлж байгаа талаар болон Мэргэжлийн болон техникийн боловсрол, сургалтын тухай, Дээд боловсролын тухай хуулиудын хэрэгжилтийг танилцуулсан.

Танилцуулгатай холбогдуулан УИХ-ын гишүүд асуулт асуув. Тухайлбал, УИХ-ын гишүүн О.Алтаншагай, Ч.Ундрам, Ш.Бямбасүрэн, Д.Бум-Очир, С.Эрдэнэбат нар сургалтын хөтөлбөрийн шинэчлэл хэрхэн хэрэгжиж буй талаар, боловсролын байгууллагын  аж ахуй, үйлчилгээг хариуцдаг ажилтнуудын цалин хөлс, нийгмийн хангамж ямар байгаа талаар, хотын төвийн ачаалал ихтэй багш нарт нэмэлт урамшуулал өгөх боломж буй эсэх, хөгжлийн бэрхшээлтэй хүүхдүүдийн сургалтын болон орон нутагт буй их, дээд сургуулиудын чанарыг сайжруулах бодлогын талаар  асуув.

Боловсролын сайд П.Наранбаяр, сургууль, цэцэрлэг зэрэг үйлчилгээний албан хаагчдыг бусдаар гүйцэтгүүлэх ажил албанд шилжүүлэх бодлогыг баримталж байна. Гэхдээ боловсролын салбарын үйлчилгээний албан хаагчдын асуудлыг сайн ярилцах шаардлагатай. Алслагдсан аймаг, сумдад ажиллаж буй багш нарт нэмэгдэл цалин хөлс өгч байна. Гэхдээ хотын төвийн сургуулиудын ачааллыг тооцож багш нарт нэмэгдэл өгөх боломжийг цаашдаа тооцож үзэх нь зөв. Хөгжлийн бэрхшээлтэй хүүхдүүдийн сургалтын чанарын асуудал 61 хувьтай буюу хангалттай бус байгааг дээшлүүлэх шаардлагатай гэж үзэж, арга хэмжээ авна. Засгийн газрын бүсчилсэн хөгжлийн үзэл баримтлалын бодлогын дагуу хөдөө, орон нутагт буй их, дээд сургуулийн чанар, хүртээмжийг нэмэгдүүлэх, сайжрууулах  арга хэмжээг хэрэгжүүлнэ гэх зэргээр хариуллаа.

Мөн УИХ-ын гишүүн Ч.Ундрам, элсэлтийн ерөнхий шалгалт бол хүүхдийн хувь заяаг нэг өдөр л шийддэг. Өөрөөр хэлбэл, нэг удаагийн шалгалтад тэнцээгүй  бол хасагдаад хүссэн сургуульдаа орох боломжгүй болдог. Тиймээс хүүхэд өөрийн хүссэн хэмжээндээ хүртэл шалгалтыг хэдэн ч удаа өгөх боломжийг бүрдүүлэх ёстой. Эцэст нь тухайн  хүүхэд зорилгодоо хүрсэн үедээ дараагийн шатны боловсрол эзэмших сургуульдаа элсдэг олон улсын жишгийг хэрэгжүүлэх боломж буй эсэх талаар асуув. Ажлын хэсгээс, 2026 оноос элсэлтийн шалгалтын журамд өөрчлөлт оруулна. Элсэлтийн шалгалтад суралцах ур чадварын шалгалт гэдгийг нэмээд олон удаа өгдөг байхаар төлөвлөж байна гэж хариуллаа. Байнгын хорооны гишүүд танилцуулгатай холбогдуулан асуулт асууж, хариулт авч, байр сууриа илэрхийллээ гэж УИХ-ын Хэвлэл мэдээллийн газраас мэдээллээ.