Америк Хятадын Бизнесийн Зөвлөлийн оройн зоогт баяр хүргэв 

12-р сарын 11-нд Хятад улсын дарга Ши Жиньпин Америк Хятадын Бизнесийн зөвлөлийн 2024 оны хүлээн авалтад баярын захидал илгээж, бизнесийн зөвлөл болон нийт гишүүдэд баяр хүргэж, Хятад, Америкийн эдийн засаг, худалдааны хамтын ажиллагааг анхаарч, дэмжиж ирсэн Америкийн бүх салбарын хүмүүст чин сэтгэлийн мэндчилгээ дэвшүүлэв.

Ши Жиньпин хэлэхдээ, Хятад Америкийн харилцаа бол хоёр орны ард түмний язгуур ашиг сонирхол, хүн төрөлхтний ирээдүй хувь заяанд нийцсэн дэлхийн хамгийн чухал хоёр талын харилцааны нэг юм. Хятад, Америк хамтарваас хоёр талд ашигтай, сөргөлдвөөс бүгд хохирох болно. Сөргөлдөөнөөс илүү яриа хэлэлцээг сонгож, өрсөлдөхөөс илүү харилцан ашигтай хамтын ажиллагаа явуулах ёстой. Хятад улс АНУ-тай харилцаа холбоогоо хэвээр хадгалж, хамтын ажиллагаагаа өргөжүүлэн, санал зөрөлдөөнөө зохицуулж, шинэ эринд хоёр орны эв найрамдлын зөв замыг эрэлхийлж, Хятад Америк урт хугацааны турш энх тайван зэрэгцэн оршиж, хоёр орон төдийгүй дэлхий дахинд ашиг тусаа өгөхөд бэлэн байна гэжээ.

Ши Жиньпин онцлохдоо, Хятад Америкийн эдийн засаг худалдааны харилцаа бол хоёр орны харилцааны чухал хэсэг юм. Хоёр орны ашиг сонирхол гүн гүнзгий уялдаатай, хамтын ажиллагааны орон зай хязгааргүй юм. Хоёр тал эрх тэгш зөвшилцөх замаар санал зөрөлдөөнөө зөв зохицуулж, харилцан нөхөх давуу талыг ашиглан хамтын ажиллагааны боломжийг тэлж, бие биенийхээ амжилтыг өрсөлдөөн сорилт биш харин боломж болгож, хоёр талын хөгжлийг харш саад биш харин түргэсгүүр болгон ашиглах ёстой гэжээ.