Ши Жиньпин шинэ оны мэндчилгээндээ “ард иргэдийн аз жаргал”, “их гүрний хариуцлага”-ыг онцлов

БНХАУ-ын дарга Ши Жиньпин айлчлан ирж буй шинэ оныг тохиолдуулан уламжлал ёсоор 12 дугаар сарын 31-ний өдөр мэндчилгээ дэвшүүллээ.

Хятад улсын дарга шинэ оны мэндчилгээндээ юу гэсэн нь Хятадын ард түмэн төдийгүй дэлхий нийтийн анхаарлыг татдаг билээ.

Ши Жиньпин улиран одож буй 2024 оныг “онцгой жил” гэж тодорхойлоод, БНХАУ орчин үеийн өөрчлөлт шинэчлэлийн замналаа томоохон алхмаар ахиулсныг онцлон дурдсан байна.

Мөн айлчлан ирж буй шинэ жилд Хятадын ард түмний нүүрэнд илүү их инээмсэглэл тодруулахын сацуу дэлхий дахинд илүү сайн сайхан ирээдүйг цогцлоохын тулд Хятад улс илүү их хүчин чармайлт гаргана гэж тэрбээр мэндчилгээндээ цохон тэмдэглэжээ.

“Ард иргэдэд бодит өгөөж”

Ард иргэдийн ажлын байр, орлого, ахмад настнууд болон хүүхдүүдийн асаргаа, боловсрол болон эрүүл мэндийн үйлчилгээтэй холбоотой асуудлууд ямагт санаанд нь байдаг болохыг тэрбээр хэлэв.

Ши Жиньпин 2024 онд улс орныхоо өнцөг булан бүрд очин ажиллахдаа жирийн ард иргэдтэй уулзан тэдний амьдрал ахуй, амьжиргааны эх үүсвэр, амьдралын нөхцөл, эрүүл мэндийн үйлчилгээний хүртээмж, хүүхдүүдийн боловсрол, ахмад настнуудын асаргаа сувилгаа гэх мэт олон асуудалтай биечлэн танилцсан юм.

БНХАУ-ын Сангийн яамны мэдэгдсэнээр, өнгөрсөн онд тус улсын засгийн газрын зарлагын 70 хувь нь ард түмний сайн сайхан амьдралыг хангахад зарцуулагдсан байна.

Тухайлбал, тус улс 2024 онд хот суурин газруудад хуучирч муудсан 50 мянган сууцыг засаж шинэчлэх ажлыг эхлүүлсэн бол бага хүүтэй орон сууцны зээлд 50 сая өрхийг хамруулсан бөгөөд үүний бодит үр өгөөжийг 150 сая орчим иргэн хүртсэн байна.

Мөн 2024 оны эхний гурван улиралд тус улсын нэг хүнд ногдох мөнгөн орлого өмнөх оны мөн үеийнхээс 5,2 хувиар өсөн 30,941 юань буюу 4,178 ам.доллар болжээ.

Түүнчлэн Хятадын нийт ард иргэдийн тавны нэгээс илүү нь 60 ба түүнээс дээш насныхан болж, хүн амын насжилтын сорилттой тулгарч буй бөгөөд Хятадын Төв Засгийн газар өндөр настнуудад зориулсан хүнсний тусламжийн хөтөлбөрүүд хэрэгжүүлэхэд 2024 онд 300 сая юань хуваарилснаас гадна гэрийн асаргаанд байдаг ахмадуудад 358 мянган ор тараасан байна.

Ши Жиньпин мэндчилгээндээ “Бидний өмнө буй бүх ажлын дотроос хамгийн чухал нь ард иргэдээ аз жаргалтай амьдруулах юм” гэж тэрбээр онцлон хэлжээ.

“Их гүрний хариуцлага”

БНХАУ-ын дарга Ши Жиньпин мэндчилгээндээ мөн “Өөрчлөлт, адармаатай буй энэ дэлхий ертөнцөд дэлхийн засаглалыг идэвхтэй хөхиүлэн дэмжиж, ‘Дэлхийн өмнөд’-ийн орнуудын эв санааны нэгдэл болон хамтын ажиллагааг бэхжүүлэхэд БНХАУ их гүрний хувиар хариуцлагатай хандаж байна” гэжээ.

Хятад улс 2024 онд дэлхий дахинд өндөр түвшний нээлттэй бөгөөд харилцан ашигтай хамтын ажиллагааг эрхэмлэн хэрэгжүүлсэн нь бусад улс оронд тус улсын орчин үеийн өөрчлөлт шинэчлэлийн өргөн боломжуудыг санал болгосон юм.

12 дугаар сарын 31-нийг хүртэлх нэг жилийн хугацаанд Хятад улсын худалдааны томоохон түнш улс орнуудын тоо 140 гаруйгаас 150 гаруй болж нэмэгдсэнээс гадна 54 улс орны иргэд Хятадаар дамжин өнгөрөхөд 240 цаг визийн чөлөөлөлт эдлэх боломжтой болоод байна.

Түүнчлэн 2024 оны турш Хятад улс Дэлхийн Өмнөдийн түншүүдтэйгээ идэвхтэй харилцаж, хамтран ажилласан бөгөөд “Энх тайвнаар зэрэгцэн оршихуйн таван зарчим” нийтлэгдсэний 70 жилийн ойг тэмдэглэх арга хэмжээний үеэр Ши Жиньпин Дэлхийн Өмнөдийн хамтын ажиллагааг дэмжих найман арга хэмжээг санал болгосон юм. Эдгээр нь сургалт, залуучуудын солилцоо, эдийн засгийн хөгжил, чөлөөт худалдаа, хөдөө аж ахуйн хамтын ажиллагаа, дижитал эдийн засаг, ногоон хөгжил болон экологи хамгааллыг хамарч буй билээ.

Үүний зэрэгцээ Хятад улс Арабын орнуудтай инноваци, санхүү, эрчим хүч, эдийн засаг ба худалдаа болон иргэд хоорондын солилцоог хамарсан хамтын ажиллагааны таван чиглэлийг тодорхойлсон. Мөн өнгөрсөн онд БНХАУ нь Латин Америк, Карибын тэнгисийн орнуудтай хөгжлийн стратегийн уялдаа холбоог гүнзгийрүүлж, Номхон далайн арлын орнуудтай хамтын ажиллагаагаа ахиулан бэхжүүлсэн.

Есдүгээр сард болсон Хятад, Африкийн хамтын ажиллагааны форумын Бээжингийн дээд хэмжээний уулзалтын үеэр “Орчин үеийн шинэчлэлийг ахиулж, хамтын ирээдүй бүхий Хятад-Африкийн хамтын нийгэмлэгийг өндөр түвшинд цогцлоох”-оо зарлан тунхагласан билээ. Үүний хүрээнд Хятад улс ирэх гурван жилийн хугацаанд 10 түншлэлийн арга хэмжээг хэрэгжүүлж, Африк тивтэй орчин үеийн хөгжлийг хамтдаа ахиулахаа мэдэгдсэн юм.

Геополитикийн хурцадмал байдал нэмэгдэж, дэлхийн тогтворгүй байдал газар авч буй үед Хятад улс яриа хэлэлцээ, зөвшилцлөөр буюу энхийн замаар аливаа асуудлыг шийдвэрлэхийг чухалчилсаар буйг Ши Жиньпин мэндчилгээндээ дурдсан байна. Тухайлбал, Газын зурваст гал зогсоох тухай НҮБ-ын Аюулгүйн Зөвлөлийн анхны тогтоолыг 2024 оны 3-р сард батлахад түлхэц үзүүлсэн, Палестины эв нэгдлийг бэхжүүлэх тухай Бээжингийн тунхаглалд 7-р сард гарын үсэг зурсан, Украины хямралын асуудлаарх “Энхийн төлөөх анд нөхөд” бүлгийг Дэлхийн өмнөдийн бусад улс оронтой хамтран байгуулсан зэргийг дурдаж болно.

Ийнхүү Ши Жиньпин “Хятад улс найрамдал, хамтын ажиллагааг хөгжүүлж, өөр өөр соёл иргэншлээс харилцан суралцах чадварыг дээшлүүлж, хүн төрөлхтний хувь заяаны хамтын нийгэмлэгийг цогцлоохын төлөө бүх улс оронтой хамтран ажилласаар байх болно” гэж мэдэгдсэн байна.

Г.Солонго