90 настай жүжигчин И Сүн Жэ анх удаа “Daesang” хүртлээ

Өмнөд Солонгосын кино урлагийн шилдгийг шалгаруулдаг “2024 KBS Drama Awards” энэ сарын 11-ний өдөр болж өндөрлөлөө. Тус шагнал гардуулах ёслолоос энэ жил 90 нас хүрч буй жүжигчин И Сүн Жэ карьерийнхаа туршид анх удаа “Daesang” шагнал хүртжээ.

“Dog Knows Everything” киногоороо ийнхүү “Шилдэг жүжигчин”-ий шагнал хүртсэн тэрээр “Өнөөдөр энэ сайхан нандин шагналыг хүртэж байгаадаа баяртай байна. Daesang-ийг ихэвчлэн түүхэн дүрүүд авдаг учраас би энэ шагналыг авна гэж бодоогүй. Жүжигчний ур чадварыг нэр хүнд болон бусад хүчин зүйлээр бус чухам хэр сайн жүжиглэж байгаагаар нь үнэлэх ёстой гэж би боддог. Энэ шагнал дан ганц миний шагнал биш ээ. “Dog Knows Everything” кинонд маш олон хүмүүс оролцсон. Хүн бүр урдаа байгаа ажлаа сайн хийсэн учраас энэ шагналыг авах завшаан тохиолоо.

Мөн бусад хүмүүст, тэр дундаа оюутнууддаа талархал илэрхийлмээр байна. Би Гачон их сургуульд 13 жил профессороор ажиллаж байна. Зураг авалтын улмаас шавь нартайгаа тэр бүр уулзаж чадахгүй үе олон байсан. Үүнд би маш их харамссан. Гэтэл тэд надад “Санаа зоволтгүй, профессор оо. Жүжиглэхдээ л анхаар, бид ч таны зассан замаар алхаж, тань шиг сайн жүжигчин болох болно” гэж хэлсэн. Үүнийг сонсоод би нулимс дуслуулсан. Би тэдэндээ маш их итгэдэг учраас бидний хамтын хүчин чармайлт өнөөдрийн үр дүнг авчирсан гэдгийг мэдэж байна. Маш их баярлалаа.

Өнөөдөр орой гэрээсээ болон танхимд хүрэлцэн ирсэн бүх үзэгчдэдээ мөн баярлалаа. Амьдралынхаа туршид та бүхнээсээ маш их тусламж дэмжлэг авсан гэдгээ сайтар ухаарч байна. Маш их баярлалаа” хэмээн нулимс дуслуулан ярьсан байна.