Asian Dragon Series тэмцээнд монголын хоёр баг оролцоно

#Dota2 Маргааш эхлэх $70,000 шагналын сантай тэмцээнд Монголын “The MongolZ” болон монгол тоглогчтой “Team Essence” багууд оролцоно.

EPIC ECHO-оос зохиож буй Dota2-ын $70,000 шагналын сантай “Asian Dragon Series: Continental Collision” тэмцээн маргааш эхэлнэ.

Хоёрдугаар сарын 10-ыг дуустал үргэлжлэх тэмцээнд 10 баг оролцох дунд Монголын “The MongolZ” болон монгол тоглогчтой “Team Essence” багууд багтаж байна.

Тэмцээн үндсэн хоёр шаттай. Эхний буюу хэсгийн шатанд арваннэгдүгээр сард болсон “Asian Dragon Series: Regional Collision” тэмцээнээс эрхээ авсан зургаан баг дээр нэмэх нь урилгаар оролцож буй хоёр баг нийлээд хэсэгт хуваагдан тоглоно.

Хэсэг тус бүрээс гурван баг Playoffs шатанд шалгарч урилгаар тус шат руу шууд уригдсан “Execration” болон “OG” багуудтай тоглох юм.

• The MongolZ “IEM Katowice” тэмцээний playoffs-т шалгарсан анхны Ази баг боллоо
• The MongolZ баг Mobile Legends-ийн эмэгтэй бүрэлдэхүүнтэй боллоо
• СПОРТЫН ЦАГЛАВАР: 2025 оны хоёрдугаар сар

Монголын The MongolZ багийн хувьд бүрэлдэхүүнээ өөрчилж ганц монгол тоглогч Бямбаагийн “khishka” Хишигбатыг чөлөөлөөд удаагүй байна. Түүний оронд Филиппиний Жардел “DJ” Мампустиг сэлгээнээс тоглуулж одоо үргэлжилж буй “AsiaPro League Season 2” тэмцээнийг дуусгах төлөвтэй. Тэд өнөөдөр 12:00 цагт тус тэмцээний хагас шигшээ шатны тоглолтоо хийх билээ.

Багийн үндсэн гишүүд болох Филиппиний Жулиус “JG” Галеон, Өмнөд Африкийн Трэвис “Castaway” Уотерс нар Asian Dragon Series тэмцээнд тоглох бөгөөд AsiaPro League Season 2 тэмцээнд түр элсүүлсэн Филиппиний Марк Энтони “Bob” Урбина болон Тайландын Ануват “Aomqu” Нгамтап нарыг дахин тоглуулах магадлалтай байна.

Харин Regional Collision-оос эрхээ авсан “Team Essence” бүрэлдэхүүнээ бүхэлд нь өөрчилж хоёр монгол тоглогчийг элсүүлсэн. Тодруулбал Малайзын Пан “ponyo” Ше Хуан, Армел “Armel” Табиос, Поло “Raven” Фаусто нар дээр Равдангийн “NARMAN” Нармандах, “Panda” нар нэг баг болжээ.