Нетаньяхуг гомдоосон тул Гаагийн шүүх АНУ-ын хоригт оров

Дональд Трамп Олон улсын эрүүгийн шүүхийг АНУ болон түүний холбоотон Израилийн эсрэг хууль бус, үндэслэлгүй арга хэмжээ авсан хэмээн буруутгаж, хориг арга хэмжээ авах зарлигт гарын үсэг зурлаа. Зарлиг ёсоор АНУ болон түүний холбоотнуудын мөрдөн байцаалтад тусалсан, оролцсон хувь хүн, тэдгээрийн гэр бүлүүдэд санхүүгийн болон визний хязгаарлалт тавина.

Израилийн ерөнхий сайд Беньямин Нетаньяхуг Вашингтонд айлчлах үеэр Трамп зарлигт гарын үсэг зурав. Олон улсын эрүүгийн шүүх өнгөрсөн оны арваннэгдүгээр сард Нетаньяху болон Хамасын командлагчийг баривчлах тушаал гаргасан билээ. Хамас, Израиль хоёрыг нэг түвшинд зэрэгцүүлж, ийн баривчлах тушаал гаргасан нь ичмээр ёс зүйгүй байдал гэж Трамп үзэж байна.

Трампийн тушаалд “Олон улсын эрүүгийн шүүхийн сүүлийн үеийн үйлдлүүд нь америкчуудыг дарамтлуулж, хүчирхийлүүлж, баривчлагдах магадлалтай эрсдэлтэй байдалд оруулж, аюултай жишиг тогтоож байна. Тэдний харгис үйлдэл АНУ-ын бүрэн эрхэд халдах аюултай. Мөн АНУ болон Израиль тэргүүтэй холбоотнуудын үндэсний аюулгүй байдал, гадаад бодлогод сөргөөр нөлөөлж байна” гэжээ.

АНУ, Израиль аль аль нь Олон улсын эрүүгийн шүүхийн гишүүн орон биш юм.

АНУ-ын зэвсэгт хүчинг Афганистанд дайны гэмт хэрэг үйлдсэн гэх үндэслэлээр мөрдөн байцаалт явуулж байсан Гаагийн албан тушаалтнуудад Трамп анхны бүрэн эрхийн хугацаандаа хориг тавьсан. Гэвч энэ хоригийг Жо Байдены засаг захиргаа хүчингүй болгожээ. Трамп Цагаан ордонд эргэн ирснээр Төлөөлөгчдийн танхим өнгөрсөн сард Олон улсын эрүүгийн шүүхэд дахин хориг тавихаар санал хураасан юм.