Арабын орнуудын лигийн онц дээд хэмжээний уулзалт болно

Арабын орнуудын лигийн Палестины асуудлаарх онц дээд хэмжээний уулзалт хоёрдугаар сарын 27-нд Каир хотноо болно гэж Египетийн Гадаад харилцааны яамнаас мэдэгджээ.

“Хэдэн өдрийн турш өрнүүлсэн зөвлөлдөөний дүнд онц дээд хэмжээний уулзалтыг зохион байгуулахаар шийдсэн юм. Дээд хэмжээний энэ уулзалтаар Палестины эргэн тойронд өрнөж буй онцгой аюултай үйл явдлуудыг хэлэлцэхээр төлөвлөж байна” гэж Египетийн Гадаад харилцааны яамнаас нийтэлсэн хэвлэлийн мэдээнд тэмдэглэсэн байна.

“Дээд хэмжээний уулзалтын гол зорилго нь Газын зурвасаас палестинчуудыг нүүлгэн шилжүүлэх төлөвлөгөөг эсэргүүцэх ажиллагааг уялдуулан зохицуулах асуудлыг хэлэлцэх явдал юм” гэж арабын зарим хэвлэл мэдээлж байсан юм. АНУ-ын ерөнхийлөгч Доналд Трамп хоёрдугаар сарын 4-нд Израилын ерөнхий сайд Биньямин Нетаньяху-тай яриа хэлэлцээ хийснийхээ дараа хамтарсан хэвлэлийн бага хурал дээр үг хэлэхдээ, АНУ Ойрх Дорнодод энх тайван тогтоох үүднээс Газын зурвасыг урт удаан хугацаанд эзэмшилдээ авах асуудлыг хэлэлцэж байгаа гэж мэдэгдэж байсан билээ. Тэрбээр палестинчуудыг хүн амьдрах аргагүй болсон Газын зурвасаас өөр бусад орон руу нүүлгэн шилжүүлэх бодолтой байгаагаа мөн илэрхийлсэн юм. Арабын орнууд, Иран улс болон өрнөдийн хэд хэдэн улс Трампын энэ санааг няцааж байгаа билээ.