Украин хэзээ нэгэн цагт Оросын бүрэлдэхүүнд орж магадгүй гэж үзэж байна

Украин хэзээ нэгэн цагт Оросын бүрэлдэхүүнд орж магадгүй гэж АНУ-ын ерөнхийлөгч Доналд Трамп үзэж байгаагийн зэрэгцээ Америкийн засгийн газрын зарцуулсан бүх мөнгийг Украинаас нэхэж авах хүсэлтэй байгаагаа үгүйсгээгүй байна.

“Бид олон зуун тэрбум доллар зарцуулж байна. Украинчууд ямар нэгэн хэлцэл байгуулж ч магадгүй, үгүй ч байж магадгүй. Тэд Оросын бүрэлдэхүүнд орж ч магадгүй, үгүй ч байж болно. Гэхдээ тэнд манай мөнгө орсон болохоор би буцааж авахыг хүсэж байна. Бид хувь тэнцүүлэн 500 тэрбум ам.долларын үнэ бүхий газрын ховор металл авах хүсэлтэй байгааг би украинчуудад хэлсэн. Тэд ерөнхийдөө зөвшөөрсөн болохоор бид тэнэг байдалд үлдэхгүй” гэж Трамп телевизийн Fox News сувагт ярилцлага өгөхдөө мэдэгджээ.

“АНУ урьдын нөхцөлөөр цаашид Украинд мөнгө гаргаж өгөх боломжгүй гэж Украины эрх баригчдад би анхааруулаад, ямар нэгэн юм хийхийг тэднээс шаардсан” гэж Америкийн төрийн тэргүүн нэмж хэлсэн байна.