Криптовалют сурталчилсан Аргентины Ерөнхийлөгчийг шалгаж эхэллээ

Аргентины Ерөнхийлөгч Хавьер Милейг нийгмийн сүлжээгээр криптовалют сурталчилсантай холбогдуулан залилан мэхэлсэн хэрэгт буруутган улмаар түүнд итгэл үзүүлэх эсэх асуудлаар парламентад санал асуулга өрнүүлж магадгүй тухай олон улсын хэвлэлүүд мэдээлж байна.

Милей өнгөрсөн баасан гарагт X сүлжээгээр LIBRA койныг сурталчлан жижиг болон гарааны бизнесийг санхүүжүүлэх замаар эдийн засгийн өсөлтийг дэмжих зорилготой хэмээн тайлбарласан юм. Ерөнхийлөгч мөн криптовалютыг худалдаж авах холбоосыг хуваалцсан нь үнэ өсөхөд хүргэсэн. Гэвч хэдхэн цагийн дараа Милей дээрх мэдээллээ устгаснаар криптовалютын үнэ огцом унаж, хөрөнгө оруулагчид ихээхэн хохирол амссан байна.

Конгрессын сөрөг хүчний зарим гишүүд Милейд импичмент зарлах ажиллагааг эхлүүлэхээр төлөвлөж буйгаа мэдэгдэв. Үүний зэрэгцээ хуульчид ням гарагт Аргентины эрүүгийн шүүхэд залилангийн хэргээр гомдол гаргажээ.

Харин Аргентины Ерөнхийлөгчийн тамгын газар Милейг криптовалютыг хөгжүүлэхэд оролцоогүй бөгөөд Авлигатай тэмцэх газар, мөн Ерөнхийлөгч өөрөө ч зүй бус үйлдэл болсон эсэхийг шалгаж тогтоох болно гэжээ.

Шүүхэд нэхэмжлэл гаргасан улстөрчдийн Жонатан Балдивиезо Ерөнхийлөгч залилангийн гэмт хэрэг үйлдсэн хэмээсэн бол Ерөнхийлөгч асан Кристина Фернандес де Киршнер түүнийг “крипто луйварчин” гэж нэрлэлээ.