Дэлхийн үзэгчдийг байлдан дагуулж буй “Нэ Жа 2”

Хятадын Хаврын баярын үеэр буюу энэ оны нэгдүгээр сард анх дэлгэцнээ гарсан “Нэ Жа 2” нь өдгөө “дэлхийн хамгийн өндөр ашиг орлоготой хүүхэлдэйн кино” гэсэн алдрын эзэн болоод байгаа юм. 2019 онд гарсан “Нэ Жа” хүүхэлдэйн киноны үргэлжлэл болох уг хүүхэлдэйн кино нь зөвхөн ашиг орлого, үзэгчдийн тоогоор тэргүүлж буй төдий бус Хятадын кино урлаг, кино зах зээл хэрхэн хурдацтай хүчээ аван хөгжиж, дэлхий дахины анхаарлыг татаж, дэлхийн шилдгүүдтэй өрсөлддөг болсны нотолгоо болж байна.

Дээд амжилтуудын эзэн

“Нэ Жа 2” гарсан даруйдаа Хятад улсдаа төдийгүй дэлхийн бусад улс оронд үзэгчдийг байлдан дагуулж эхэлсэн. Чөтгөрүүдтэй тулалддаг домогт хүүгийн тухай өгүүлдэг тус кино нь өмнө нь гарч байсан бусад хүүхэлдэйн киноны дээд амжилтуудыг давсан нь Хятадын ард түмний бахархлыг төрүүлээд зогсохгүй, саяхныг болтол Холливудын бүтээлүүдийн сүүдэрт дарагдсаар байсан дэлхийн бусад улс орны кино урлагийн хувьд итгэл найдварын гэрэл болж байна.

Дэлхийн хүүхэлдэйн киноны зах зээлд Холливудын кинонууд давамгайлсаар ирсэн түүхтэй. Тухайлбал, “Toy Story” буюу “Тоглоомын түүх”, “The Lion King” буюу “Араатны хаан арслан”, “Inside Out 2” болон “Frozen” зэрэг нь дэлхийн хүүхэлдэйн киноны чиг хандлагыг тодорхойлж ирсэн. Тэгвэл “Нэ Жа 2”-ын амжилт нь Хятад улс дэлхийн энтертайнмент салбарт нөлөөгөө тэлж, шинэ өнгө төрхийг тодорхойлдог болсныг илтгэн харууллаа.

Хоёрдугаар сарын 18-ны байдлаар, “Нэ Жа 2” дэлхийн кино зах зээлээс 12.32 тэрбум юань буюу 1.7 тэрбум ам.долларын ашиг орлого олоод байна. Ингэснээр тус кино нь “Inside Out 2”-ын тогтоосон дээд амжилтыг эвдэн дэлхийн хамгийн өндөр ашиг орлоготой хүүхэлдэйн кино болж, бүх цаг үеийн хамгийн их ашиг олсон 8 киноны тоонд багтаад байна.

Мөн “Нэ Жа 2” нь ганц зах зээлээс буюу нэг улсаас 1 тэрбум ам.долларын ашиг олсон анхны кино гэсэн түүхэн амжилтын эзэн болоод буй юм.

Түүнчлэн дэлхийн хэмжээнд орлого нь 1 тэрбум ам.доллароос давсан Холливудын бус анхны кино, дэлхийн шилдэг борлуулалттай 10 киноны тоонд орсон анхны Азийн кино зэрэг олон олон амжилтын эзэн болоод байна.

Хятадын хүүхэлдэйн киноны ирээдүй

“Нэ Жа 2”-ын амжилт бол зүгээр эхлэл юм. Хятадын хүүхэлдэйн киноны салбар чанар бөгөөд нэр хүндийн хувьд тогтвортой сайжирч, өдгөө дэлхийн тавцанд гол тоглогчдын нэг болсныг энэхүү кино дэлхий нийтэд нотлон харууллаа.

Төр засгийн дэмжлэг болон авьяаслаг уран бүтээлчдийн хоршил нь Хятадын хүүхэлдэйн киноны ирээдүйг тодоос тод гэрэлтүүлж байна.

Хүүхэлдэйн киноны зах зээл өргөжин тэлсээр буй өнөө цаг үед “Нэ Жа 2” энэ салбарт ийнхүү шинэ жишиг тогтоож өглөө. Баялаг соёл, хүүхэлдэйн кино бүтээх хамгийн сүүлийн үеийн техник технологиор хөглөгдсөн Хятадын хүүхэлдэйн киноны зах зээл нь Өрнийн соёл давамгайлсан өгүүлэмжийг сөрж, соёл хоорондын солилцооны шинэ боломжуудыг дэлхий дахинд санал болгож, улам бүр хөгжин дэвжсээр байх нь тодорхой.

Хятадын хүүхэлдэйн киноны хөгжил нь дэлхийн энтертайнмент салбар хувьсан өөрчлөгдөж буйн гэрч бөгөөд Хятадын хүүхэлдэйн киноны сэтгэл татам ертөнцтэй цаашид хэр олон үзэгч танилцаж, хэчнээн кино дэлхий дахиныг “Нэ Жа 2” шиг байлдан дагуулах нь ердөө цаг хугацааны л асуудал юм.

Г.Солонго