Талийгаач Ким Се Руны аав юүтүбэр залууг охиныхоо үхэлд БУРУУТГАЖЭЭ

Жүжигчин Ким Се Рун өнгөрсөн сарын 16-нд 25 насандаа амиа егүүтгэн нас барсан. Түүнийг нас барснаас 20 хоногийн дараа буюу энэ сарын 9-ны өдөр түүний гэр бүлийнхэн Daily Sports сонинд ярилцлага өгөхдөө юүтүбэр И Жин У болон бусад хоёр хүн, холбогдох хэвлэл мэдээллийн хэрэгслүүдэд хуулийн дагуу арга хэмжээ авна гэдгээ мэдэгдлээ.

Талийгаачийн гэр бүлийнхэн “Хүмүүс биднийг ямар тамыг даван туулж байгааг мэдээгүй учраас их амархан байгаа мэтээр ярьдаг. Бид түүнийг 24 цагийн турш хянаж, цагдаж чадахгүй шүү дээ. Бид түүнийг сэтгэцийн эмнэлэгт хэвтүүлэх ёстой байсан юм уу? Ажил дээрээ байхдаа түүний тухай сонсоод яаран очсон ч тэр автомашины осолд орчхоод эмчилгээ хийлгэхээс татгалзсан.

Хүмүүсийн гаргасан үйлдлийг үнэхээр уучилж болохгүй. Тэд зүгээр л нэг Сэ Руны амьдралыг сүйрүүлээд зогсохгүй бүхэл бүтэн нэг гэр бүлийг сүйрүүлсэн. Энэ хорвоо дэлхий дээр юу ч тохиолдсон бай хорон муу сэтгэлээр бодит байдлыг мушгин гуйвуулсан хүмүүсийг бид хэзээ ч уучлахгүй” гэжээ.

Ким Се Руны аав “YouTube Shorts болон бусад платформууд дээр Се Руны эвгүй бичлэгүүд цацагдаж, гэр бүлийнхэн нь түүний олсон мөнгийг үгүй хийсэн гэх цуу яриа гарсан. Эдгээр зүйлсээс болж гэр бүлийнхэн минь, тэр дундаа миний хоёр охин шударга бусаар доромжлуулж байна. Энэ бүхэн худал гэдгийг бид өдөр бүр тайлбарлах ёстой юу? Эхнэр бид хоёр энэ бүхнийг тэвчиж болох ч Сэ Руны дүү нар яах болж байна вэ? Би үлдсэн хоёр охиноо яаж хамгаалах ёстой юм бэ? Танихгүй хүмүүс тэдэн рүү миний чичилж эхэлбэл бид насан туршдаа худал гүтгэлгийн дор амьдрах гэж үү? Би цацагдсан бичлэгүүдийг устгахыг үнэхээр их хүсч байна.

Юүтүбэр И Жин У-д хуулийн хариуцлага тооцохыг хүсч байна. Дан ганц түүнд ч биш, энэ төрлийн контент бүтээж, үүнийг нь түгээж, хорлонтой сэтгэгдэл бичсэн хүмүүст ч мөн адил” гэжээ.

Уг ярилцлагынхаа дараа талийгаачийн аав ярилцлага авсан сэтгүүлч рүү “Надад хэлэх зүйл байгаа болохоор оройтсон ч гэсэн мессеж бичиж байна. Бид аль хэдийнэ сэтгэлээрээ үхчхээд байна. Хайртай үрээ алдчхаад ямар эцэг, эх нь үргэлжлүүлэн амьдрах юм бэ? Үлдсэн үр хүүхдээ бодож л тэвчиж амьдарч байна. Гэвч надад хар бараан бодол эргэлдсээр л байна. Ялангуяа эхнэр минь өөрийгөө буруутгасаар байна. Энэ нь надад ч гэсэн үнэхээр хэцүү байна. Ганцхан удаа ч гэсэн үнэнийг ил болгоход надад туслаач” хэмээх мессеж илгээжээ.

Уг юүтүбэр талийгаачийн тухай хэд хэдэн удаагийн бичлэг нийтэлж байжээ. Тухайлбал өнгөрөгч нэгдүгээр сард түүний хуримын сэдэвтэй зураг авалтыг шүүмжилсэн видео нийтэлсэн бол өмнө нь санхүүгийн хүндрэлээс болж кофе шопод ажиллаж байгаа гэх видеог мөн олон нийтэд цацсанаар жүжигчин бүсгүй олон нийтийн зүгээс их хэмжээний эсэргүүцэлтэй тулгарч байсан аж. Эдгээр бичлэгүүдийг үзсэн Ким Сэ Рун маш их стресстэж, сэтгэл санаагаар унасан тухай түүний ойр дотнынхон мөн дурдсан байна. Талийгаачийг нас барсан гэх мэдээлэл цацагдсаны дараа уг юүтүбэр жүжигчин бүсгүйн талаар нийтэлсэн бүхий л бичлэгүүдээ устгажээ.