Путин 30 өдрийн гал зогсоох хэлэлцээрээс татгалзав

ОХУ-ын ерөнхийлөгч Путин Украинд гал зогсоох асуудлаар Дональд Трамптай хоёр цаг гаруй утсаар ярилцав. 30 өдрийн гал зогсоох хэлэлцээр нь энхийн гэрээний эхний алхам болно гэж талууд найдаж байв. Гэвч Путин Украины эрчим хүчний байгууламжид халдлага үйлдэхээ зогсооно гэсэн ч 30 өдрийн бүрэн гал зогсоох хэлэлцээрээс татгалзав. Тэрбээр Трамптай ярилцаж дуусмагцаа Украины эрчим хүчний байгууламжуудад цохилт өгөхөө зогсоох тушаалыг армидаа өгсөн байна.

Трамп энэ яриагаа гайхалтай болсон гэж дүгнэсэн боловч хүссэн үр дүндээ хүрч чадсангүй.

Оросын арми Украинд идэвхтэй давшиж буй тул Путин цаг хугацаа алдахгүйн тулд томоохон буулт хийхээс зайлсхийсэн гэж шинжээчид үзэж байна. Түр гал зогсоох нь Украинд цэргээ зэвсэглэх боломж олгоно гэж тэр болгоомжилсон бололтой. “Дайныг сунжруулж буй энэ оролдлогыг нь дэлхий нийт хүлээн зөвшөөрөхгүй байх ёстой” гэж Путин хэлжээ.

Украин хариуд нь сарын хугацаанд харилцан эрчим хүчний байгууламжууддаа цохилт өгөхгүй гэх байдлаар гэрээг цомхон болгохыг дэмжинэ гэж мэдэгдлээ. Харин Цагаан ордон энхийн төлөвлөгөөнд чиглэсэн илүү өргөн цар хүрээтэй яриа хэлэлцээг даруй эхлүүлнэ гэж мэдэгдэв.

Германы Маршаллын сангийн ерөнхий захирал Кристин Берзина “Энэхүү дуудлага нь Оростой хэлэлцэхэд ямар хэцүү гэдгийг, мөн тэд дайныг зогсоохын тулд ямар ч бодитой ахиц дэвшил гаргах хүсэлгүй байгааг харууллаа. Хязгаарлагдмал гал зогсоох хэлэлцээр бол маш жижигээр л урагшилж буй явдал” гэв.

Путин, Трамп нарын хэлэлцээтэй зэрэгцэн ОХУ Мягмар гаригийн орой 40 гаруй нисгэгчгүй нисэх онгоц хөөргөсөн нь Сумы болон бусад бүс нутагт хүрсэн. Тэр дундаа Киев мужийн эмнэлгийн байгууламжид цохилт өгчээ.

Мөн энэ үеэр Зеленский Хельсинк хотод албан ёсны айлчлалаар иржээ. Тэрбээр Украины энхийн хэлэлцээнд Европыг оролцуулах ёстой гэж мэдэгдэв. Мөн ОХУ-ыг эзлэн авсан газар нутгаа буцааж өгөх ёстой гэсэн шаардлагыг тавьж байна.

Европын орнууд Орос, Украины гал зогсоох хэлэлцээрийн талаар өөр өөрсдийн байр сууриа илэрхийлж байна. Тухайлбал, Европын комиссын тэргүүн Урсула фон дер Лейен “ОХУ ирээдүйд Европын ардчилалтай сөргөлдөж болзошгүй тул бид үүнд бэлтгэхийн тулд цэрэг, аж үйлдвэрийн хүчин чадлаа ихээхэн нэмэгдүүлсэн” гэж анхааруулсан юм. Харин Германы канцлер асан Олаф Шольц “Гал зогсоох хязгаарлагдмал анхны алхам чухал боловч бүрэн гал зогсоохыг дахин уриалж байна” гэжээ.

Дашрамд дурдахад, Украинд гал зогсоох алхамыг хянах ажлын хүрээнд Европын орнууд 25-30 мянган цэрэг илгээж магадгүйг хэвлэлүүд мэдээлж байна. Гэхдээ тэдгээр цэргийг фронтын шугам дагуу байрлуулахгүй. Оросын арми дахин байлдааны ажиллагаа явуулбал шуурхай хариу өгөх үүднээс байрлуулна гэж байжээ. Франц улс жишээ нь 10 мянган цэргээ илгээх боломжтой гэж мэдэгдсэн. Их Британи ч бас хүч нэмэх хүсэлтэй байгаагаа илэрхийлжээ.