Хүн төрөлхтний хувь заяаны хамтын нийгэмлэгийн утга учир

Энэхүү үзэл баримтлал нь өнөөгийн цаг үеийн сорилтуудыг даван туулахад чиглэсэн, Хятад улсаас санаачилсан өндөр ач холбогдол бүхий хандлага юм. Дэлхий нийт эрчимтэй өөрчлөлт, их хөгжил, их шилжилтийн үед орж, эдийн засгийн өсөлт удаашран, бүс нутгийн мөргөлдөөн хурцдаж буй энэ үед хүн төрөлхтний өмнө тулгарч буй томоохон асуудлуудыг шийдвэрлэх шаардлага урган гарч байна. Уур амьсгалын өөрчлөлт, хүнсний хангамж, эрчим хүчний хямрал зэрэг хүн төрөлхтний хөгжлийг тодорхойлох асуудлуудад хэрхэн хандах, ямар ирээдүйг бүтээх нь бүх улс орны өмнө тулгарч буй амин чухал асуудал болжээ.

Өнгөрсөн 12 жилийн хугацаанд Ши Жиньпин олон улсын томоохон арга хэмжээнүүдийн үеэр “Хүн төрөлхтний хувь заяаны хамтын нийгэмлэг” үзэл баримтлалаа дэлгэрэнгүй танилцуулж, “энх тайван, аюулгүй, хамтдаа хөгжсөн, цэвэр, тогтвортой дэлхий ертөнцийг цогцлоон бүтээх” Хятадын санаачилгыг дэвшүүлсээр ирсэн юм. Үүний зэрэгцээ тэрбээр “Бүс ба Зам” санаачилга, “Дэлхийн хөгжлийн санаачилга”, “Дэлхийн аюулгүй байдлын санаачилга”, “Дэлхийн соёл иргэншлийн санаачилга” зэрэг санаачилгаа танилцуулж, хүн төрөлхтний хувь заяаны хамтын нийгэмлэг үзэл баримтлалыг баяжуулан хөгжүүлсэн юм.

Ши Жиньпин “хүн төрөлхтний хувь заяаны хамтын нийгэмлэгийг байгуулах нь нэг улс нөгөөгөө давамгайлан орлох, нэг соёл иргэншил нөгөөгөө халан солих тухай асуудал биш” гэдгийг онцолсон байдаг. Харин өөр өөр нийгмийн тогтолцоотой, үзэл санаа, түүх, соёл, хөгжлийн түвшингээрээ ялгаатай улс орнууд нийтлэг эрх ашгаа хамгаалж, үүрэг хариуцлагаа хуваалцан, хамтдаа илүү сайхан дэлхийг бүтээхэд чиглэсэн хамтын ажиллагааны загвар байх ёстой гэж тодорхойлсон байна. Энэ зорилтыг хэрэгжүүлэхийн тулд тэрбээр яриа хэлэлцээ, зөвшилцөх, хамтран ажиллах, харилцан ашигтай хамтдаа хөгжих, соёлын харилцан ойлголцлыг нэмэгдүүлэх, байгаль орчныг хамгаалах гэсэн таван үндсэн зарчмыг баримтлахыг уриалсан юм.

Өнгөрсөн жилүүдэд “Хүн төрөлхтний хувь заяаны хамтын нийгэмлэг” үзэл баримтлал онолын түвшнээс бодит үйл ажиллагаа болон хэрэгжиж эхэлсэн юм. “Бүс ба Зам” санаачилга дэд бүтцийн хөгжилд томоохон түлхэц үзүүлж, “Дэлхийн хөгжлийн санаачилга” нь хөгжиж буй орнуудын хамтын ажиллагааг өргөжүүлж, Азийн дэд бүтцийн хөрөнгө оруулалтын банк (AIIB) 110 гишүүн оронтой томоохон банк санхүүгийн тогтолцоо болон өргөжсөн. Мөн “Парисын хэлэлцээр”, “Биологийн олон янз байдлын тухай конвенц” зэрэг олон улсын гэрээ, хэлэлцээрүүдэд Хятад улс хариуцлагатай байр сууринаас оролцон, ногоон хөгжил, тогтвортой байдлыг дэмжих үүрэг хүлээсэн нь үүний тод жишээ юм.

Өнгөрсөн 12 жилийн хугацаанд олон улс орон “Хүн төрөлхтний хувь заяаны хамтын нийгэмлэг” үзэл баримтлалыг хүлээн зөвшөөрч, дэлхий даяар Хятадын санаачилсан гурван том санаачилгыг дэмжсэн байна. Улмаар дэлхийн улс орнуудын дөрөвний гурваас илүү нь “Бүс ба Зам” санаачилгад нэгдэж, хамтын хөгжил, аюулгүй байдлын төлөөх дэлхийн хэмжээний түншлэлийг бий болгоод байна.

Энэ бүхэн дэлхийн тогтвортой хөгжил, энх тайван, аюулгүй байдлыг хангахад хамтын ажиллагаа, харилцан ойлголцол хамгийн чухал болохыг илтгэнэ. Улс орон бүрийн хөгжил, аюулгүй байдал бусад улсын хөгжил, аюулгүй байдлаас хамааралтай болсон өнөө үед бид дэлхий ертөнцийг нийт хүн төрөлхтний хамтын гэр орон болгох зорилго дор хамтдаа хүчин чармайлт гаргах ёстой юм.