Лукас Пакета бүх насаараа хөлбөмбөг тоглох эрхээ хасуулж болзошгүй

Бразилын шигшээ болон Английн “Вест Хэм”-ийн хөлбөмбөгч Лукас Пакетагийн хувьд амаргүй өдрүүд үргэлжилж байна. Гэхдээ тэрбээр толгой гудайлгүй бэлтгэлээ хийж, өнөө орой талбайд гарах найдлага өвөртөлж буй гэнэ.

Лукас Пакетаг санаатайгаар дөрвөн ч удаа шар хуудас авч, бетээр мөнгө хожих боломжийг ойр дотныхон болон танилууддаа олгосон гэж сэжиглэж эхэлснээс хойш багагүй хугацаа өнгөрлөө. Энэ хугацаанд сэжгийг баримтжуулах, мөрдөн шалгах ажиллагаа өрнөсөн юм. Тэгвэл өнгөрсөн гуравдугаар сарын 17-нд Пакетагийн хэргийг шүүн хэлэлцэж эхэлсэн. 3 дахь долоо хоног руугаа ороод буй шүүх хурлыг энэ долоо хоногийн сүүлчээр дуусна гэсэн найдвар хөлбөмбөгчид байгаа юм байна.

Хэрвээ Пакета тэрхүү дөрвөн шар хуудсыг санаатайгаар авсан бол бүх насаар нь хөлбөмбөг тоглох эрхийг нь хасах магадлалтай гэсэн мэдээлэл цацагдсан. Гэвч хөлбөмбөгч энэ хэцүү өдрүүдэд толгой гудайлгүй бэлтгэлээ хийсээр байгааг ахлах дасгалжуулагч Грэм Поттер ярьжээ.

”Пакета яг байдгаараа л хэвийн харагдаж байна. Бэлтгэлээ ч сайн хийж байгаа. Одоо энэ хурал нь дуусаад, шийдвэр нь гарчихвал бид талбайд хурдхан гараасай л гэж хүлээх юм. Үнэндээ би тэр хэргийн талаар мэдэхгүй болохоор бодохгүй ч үгүй яваа. Тэгээд ч надад өөрийн ажил гэж толгойтой үснээс их байна шүү дээ” гэж Грэм Поттер өгүүлжээ.

Пакетаг ийнхүү шүүх хурлын танхимд сууж байхад Бразилын шигшээ мөнхийн хөрш мөн үүрдийн өрсөлдөгч Аргентинд 4:1-ээр хол хожигдож, олны шүүмжлэлийн гол бай болсон төдийгүй ахлах дасгалжуулагчаа ч халлаа. Пакета хэргийг нааштайгаар шийднэ хэмээн найдахын зэрэгцээ Бразилын шигшээдээ мөдхөн дахин дуудагдаж, Колумб, Аргентины эсрэг тоглохыг эрмэлзэж байна.