Овечкин NHL-ийн түүхэн шилдэг мэргэн бууч боллоо

Улаанбаатарын цагаар бол өнөө өглөө болсон “Нью-Йорк Айлендерс”-“Вашингтон Капиталс”-ын тоглолт 4:1-ээр өндөрлөлөө. Хэдийгээр нийслэлийн багийнхан хожигдсон ч гэлээ тэдний ганц гоолыг багийн ахлагч Александр Овечкин оруулснаар 895 дахь гоолоо бүртгүүлж, NHL-ийн түүхэн шилдэг мэргэн буучаар тодорлоо.

Овечкинийг түүхэн гоолоо хийсний дараагаар ордонд цугласан үзэгчид “Ови, Ови!!!” хэмээн дэмжин хашхиралдан баяр хүргэсэн байна. Мөн ордонд байрлуулсан том дэлгэцээр Овечкиний эхнэр хоёр хүүхдийнхээ хамтаар нөхөртөө баяр хүргэхдээ “Бид чамаараа маш их бахархаж байна” гэжээ. Үүний дараагаар Александрын ээж, олимпын хошой аварга Татьяна Овечкиний баяр хүргэсэн үгсийг мөн үзүүлэв.

Харин мөдхөн мөсөн талбайд домогт Уэйн Гретцки өөрөө гарч ирэн, дээд амжилтыг нь шинэчилсэн Овечкинд баяр хүргэн, дурсгалын зураг бэлэглэлээ.

Олон жилийн хөдөлмөрөөрөө аугаа амжилтад хүрсэн энэ өдрийн гол баатар Александр Овечкин үг хэлэхдээ “Ямар гайхамшигтай сайхан өдөр вэ! Хоккей бол багийн спорт гэж би байнга хэлдэг. Багийнхан, дасгалжуулагчид, хөгжөөн дэмжигчид, лигийнхэнгүйгээр бол би юу ч хийж чадахгүй. Энд ч зогсохгүй, энэ аугаа амжилтыг ч шинэчлэхгүй байх байсан. Найзууд аа, та бүхэндээ маш их баярлалаа. Та нартаа маш их хайртай шүү” гэж хэлснийхээ дараагаар наргиа хийхээ ч марталгүй “Айлендерс”-ийн хаалгачид хандан “Илья Сорокин, 895 дахь гоолоо оруулах боломж олгосонд баярлалаа. Чамгүйгээр би энэ амжилтад хүрч чадахгүй байх байлаа” гэжээ.

Харин тоглолтын дараах хэвлэлийн бага хурал дээр “Одоо ч итгэж чадахгүй юм. Сэтгэл их догдоллоо. Аугаа сайхан орой боллоо. Итгэхэд үнэхээр хэцүү байна. Итгэтлээ хэдэн өдөр магадгүй бүр хэдэн долоо хоног болох биз” гэжээ.