Н.Учрал: Х.Баттулга намайг нотол гэсэн, надад баримт бий!

Засгийн газрын өнөөдрийн (2025.04.09) хуралдаанаас гарсан шийдвэрүүдийг танилцууллаа.

Энэ үеэр Засгийн газрын хэрэг эрхлэх газрын дарга Н.Учрал Ерөнхийлөгч асан Х.Баттулгын нэр холбогдоод буй “Төгрөг нуурын орд”-той холбоотой асуудлын талаар “Үндэсний баялгийн сангийн хэрэгжүүлэх ажлын хэсгийн ахлагчийн хувиар стратегийн ордуудад ээлж дараатайгаар санхүүгийн, хуулийн шинжилгээ хийж байгаа. Олон нийтийн анхаарлыг татсан “Төгрөг нуурын орд” газар дээр бид санхүүгийн болон хуулийн шинжилгээ хийсэн.

“Төгрөг нуурын орд” нь Монгол Улсын Ерөнхийлөгч асан Х.Баттулгатай хамааралтай талаар өмнө нь мэдээлсэн. Энэхүү асуудлаа шийдэх долоо хоногийн хугацаа өгсөн ч түүнээс ямар нэгэн бичиг ирээгүй, үйлдэл хийгээгүй, Засгийн газарт ямар нэгэн мэдээлэл огт ирүүлээгүй. 

Өчигдөр хэвлэл мэдээллийн байгууллагад ярилцлага өгсөн мэдээлэлтэй байна. Энэ үеэрээ “Төгрөг нуурын орд”-той холбоотой ямар нэгэн мэдээлэл хийгээгүй байна гэж би ойлгож байна. Хэвлэл мэдээллийн байгууллагаас авсан мэдээллээр намайг “Төгрөг нуурын орд”-той холбоотой гэж баталж чадах юм бол 100 хувь аваарай гэсэн байсан.

Би өнөөдөр хариуцлагатайгаар хэлье. Та хэлсэн үгэндээ эзэн байгаарай. Та нотол гэсэн, би нотолж байна. Надад хөдөлшгүй нотлох баримтууд бий. Албан ёсны баталгаатай эх сурвалжууд бий, санхүүгийн болон хуулийн мэргэжилтнүүдийн дүн шинжилгээ байна. Баримт өөрөө ярьдаг гэдэг. Эдгээр баримтууд дээр 2016 онд Х.Баттулга 90 хувийг нь, Я.Батсүх гэдэг иргэн 10 хувийг нь эзэмшиж байсан “Камекс” ХХК компани “Төгрөг нуур энержи” компанийг 100 хувь эзэмшдэг болохыг нотолсон баримт бий” гэлээ.