АНУ тарифын бодлогодоо шинэ өөрчлөлт оруулж байна

Завсрын бүтээгдэхүүний хоёр дахь том импортлогч, экспортлогчийн хувьд АНУ-ын дундаас дээд зэрэглэлийн үйлдвэрлэл нь Хятад зэрэг хөгжиж буй эдийн засагтай, үйлдвэрлэлийн хүчин чадал, аж үйлдвэрийн интеграцчлалын чадавхтай орнуудад илүү төвлөрч байна. Олон улсын зарим байгууллага Apple гар утасны үйлдвэрлэл, угсралтын 90 орчим хувь нь Хятадад байдаг бөгөөд АНУ Хятадад татвар ногдуулснаар Apple-ийн гар утасны үнэ 30-40 хувиар өснө гэж онцолжээ.

Америкийн банкны шинжээчдийн тооцоолсноор, хэрэв iPhone-ийн эцсийн угсралтыг АНУ руу шилжүүлбэл өртөг нь 25 хувиар нэмэгдэнэ; Дээр нь дахин “харилцан тариф” нэмэх юм бол нийт зардал 91 хувиар өсөх магадлалтай. Wedbush Securities-ийн санхүүгийн шинжээч Даниел Айвс, хэрэв АНУ-ын засгийн газар холбогдох бүтээгдэхүүнүүдийг татвараас чөлөөлөхгүй бол “АНУ-ын технологийн салбар арван жил ухарч, хиймэл оюун ухааны хувьсгал ч мэдэгдэхүйц удааширна” гэжээ.

Эндээс харахад АНУ өөрийн аж үйлдвэрийн чадавхаа хэт итгэж, дэлхийн аж үйлдвэрийн гинжин хэлхээний цогц уялдаа чанарыг дутуу үнэлсэн байна. Дөрөвдүгээр сарын 2-нд АНУ “харилцан тариф”-ийг нэвтрүүлснээс хойш олон улсын эдийн засаг, худалдааны дэг журам алдагдаж, бизнесийн үйл ажиллагаа, иргэдийн амьдрал нөлөөлөгдөж, АНУ өөрөө бүр сөрөг үр дагавар амсах болсон нь бодит баримтаар нотлогдож байна.

“АНУ-ын бизнесийн гол салбар нь бусад улстай хийсэн худалдааны асар их илүүдэлтэй бөгөөд худалдааны дайнд АНУ-ын ажлын байр эрсдэлтэй байх болно.” Орон нутгийн цагаар 11-ний өдөр CNN агентлаг Америкийн үйлчилгээний худалдааны салбарт бусад улс орнуудаас хариу арга хэмжээ авч, ажлын байраа алдаж болзошгүйг анхааруулсан нийтлэл нийтэлжээ.

Хоёр хоногийн өмнө Хятад улс импортын америк киноныхоо тоог зохих хэмжээгээр бууруулахаа зарласнаар Америкийн олон кино компанийн хувьцааны ханш огцом буурч байгааг гадаадынхан анзаарчээ. Дөрөвдүгээр сарын 12-ны өдрийн 17:38 цагийн байдлаар, Хятадын 2025 оны кассын орлого (урьдчилсан борлуулалтыг оруулаад) 25 тэрбум юанийг давж, дэлхийн нэгдүгээрт жагсжээ.

Үүний зэрэгцээ АНУ-тай 100 гаруй тэрбум еврогийн үйлчилгээний худалдааны алдагдалтай Европын холбоо ч хэрэв АНУ бодлогоо дахин өөрчлөх юм уу дарамт шахалт үзүүлэх юм бол үйлчилгээний худалдаагаар дамжуулан хариу арга хэмжээ авахыг үгүйсгэхгүй гэж мэдэгджээ.

Олон нийтийн тоо баримтаас үзвэл, АНУ үйлчилгээний худалдааны урт хугацааны илүүдэлтэй байгаа бөгөөд 2024 онд ойролцоогоор 300 тэрбум ам.долларын ашигтай байна. АНУ-ын компаниуд жил бүр оюуны өмчийн лицензийн төлбөрт 144 тэрбум гаруй ам.доллар цуглуулдаг. Үйлчилгээний экспорт АНУ-д 4.1 сая ажлын байрыг бий болгож байна.

Үйлчилгээний худалдааны үндэс нь барааны худалдаа гэдгийг тэмдэглэх нь зүйтэй. Тухайлбал, олон улсын санхүүгийн үйлчилгээг олон улсын худалдаа, хөрөнгө оруулалтыг санхүүжүүлэхэд голчлон ашигладаг. Хэрэв дэлхийн олон улсын барааны худалдааны талаас илүү хувь нь алга болчихвол дэлхий дахинд АНУ-аас хэр их санхүүгийн үйлчилгээ хэрэгтэй болох вэ?

Үйлчилгээний худалдааг нарийн ажиглавал итгэлцэлд тулгуурладаг. Сүүлийн жилүүдэд АНУ-ын хориг арга хэмжээ, дарамт шахалт, албадлага дэлхий даяар тархаж, талуудын АНУ-д итгэх итгэлийг алдууруулж байна. Яг одоо АНУ дэлхийн эсрэг тарифын шантаажийг дахин эхлүүлж буй нөхцөлд санхүүгийн үйлчилгээ, боловсролын үйлчилгээ, дата үйлчилгээ, компьютерын үйлчилгээг АНУ-д даатгахад хэн бэлэн байж чадах вэ?