Зээлийн хүүг бууруулах талаар банкныхантай ярилцана

Зээлийн хүү өндөр байгаагаас иргэд зээлээс зээлийн хооронд амьдрах болсон билээ.

УИХ-ын дарга Д.Амарбаясгалан энэ долоо хоногт зээлийн хүүг бууруулах асуудлаар Монголбанк, арилжааны банкны удирдлагуудтай ярилцана.

Арилжааны банкны бизнесийн зээл жилийн 20 гаруй хувийн хүүтэй байгаа бол банк бус санхүүгийн байгууллагынх жилийнх нь 40 хувь давсан. Иймээс УИХ-ын түвшинд зохицуулах шаардлагатай хэмээн үзэж байгаа аж. Энэ талаар УИХ-ын дарга

Д.Амарбаясгалан “Богино эргэлттэй, өндөр хүүтэй мөнгө хүүлэх байдал газар авсан нь ажиглагдсан. Энэ долоо хоногт Монголбанк болон арилжааны банкны удирдлагуудтай зээлийн хүүг бууруулах асуудлаар нээлттэй ярилцлага зохион байгуулна. Банкууд дэргэдээ Банк бус санхүүгийн байгууллага байгуулаад банкнаас арилжааны зориулалтай зээл аваад Банк бус санхүүгийн байгууллагаар дамжуулан иргэдэд хэрэглээний зээл хэлбэрээр өгч байна. 2024 онд банкуудаас Банк бус санхүүгийн байгууллагуудын авсан зээл 700 гаруй тэрбумд хүрсэн. Банкнаас жилийн 24 орчим хүүтэй авсан зээлээ иргэдэд олгохдоо 36-50 хувийн хүүтэй зээлж байна. Улмаар ломбардууд дахин илүү өндөр хүүтэй зээл олгох зэрэг иргэдэд  санхүүгийн дарамт үзүүлж буй асуудлыг УИХ-ын түвшинд зохицуулах шаардлагатай гэж үзэж байна” хэмээн мэдэгджээ. Монголд гадаадын хөрөнгө оруулалттай банк орж ирвэл өрсөлдөөн бий болж, зээлийн хүү буурахад нөлөөлнө гэж үзэж байгаа ч Монголбанкны зүгээс өнгөрсөн дөрвөн жил орчим гадаадын хөрөнгө оруулалттай банк татах чиглэлд ажилласан ч санал орж ирээгүй. Монголд гадаадын хөрөнгө оруулалттай банк орж ирдэггүй шалтгааныг банк санхүүгийн салбарынхан “Зах зээл дэндүү жижиг буюу хүн ам цөөтэй нь гадаадын хөрөнгө оруулалттай банкны салбар Монголд ажиллах нь ашиг өгөхгүй гэж үздэгтэй холбоотой” хэмээн тайлбарладаг.