АНУ боловсролыг “боомилж” байна

АНУ-ын Ерөнхийлөгч Дональд Трампын засаг захиргаа гадаад оюутнуудын эрхийг ноцтой зөрчиж, боловсролыг улс төрийн хэрэгсэл болгон ашиглаж эхэллээ.

АНУ-ын Төрийн нарийн бичгийн дарга Марко Рубио Элчин сайдын яамд болон дипломат төлөөлөгчийн газрууддаа гадаад оюутны визийн ярилцлагын цаг шинээр товлохыг зогсоох үүрэг чиглэлийг өгсөн болохыг эх сурвалжууд мэдээлж байна.

Тодруулбал, Төрийн департамент нь гадаад оюутан, солилцооны хөтөлбөрт хамрагдагчдын нийгмийн сүлжээний хэрэглээг өргөн хүрээнд шалгах шинэ журмыг боловсруулж байгаа бөгөөд энэ ажлын хүрээнд визний ярилцлага товлохыг зогсоож буй аж. Трампын засаг захиргааны цагаачлалын эсрэг хатуу бодлого нь дэлхий нийтийн эв нэгдэл, харилцан ойлголцол, соёлын солилцооны гүүр болсон боловсролын салбарыг ч ийнхүү тойрсонгүй.

Үзэл бодлоо илэрхийлэх нь “гэмт хэрэг” биш

Палестиныг дэмжиж, Газын зурваст Израилийн явуулж буй ажиллагааг шүүмжилсэн гадаад оюутнууд болон ногоон карт эзэмшигчдийг АНУ-аас албадан гаргахаа Трампын засаг захиргааны албаны хүмүүс мэдэгдэж,  үзэл бодлоо илэрхийлснийг нь “АНУ-ын гадаад бодлогод заналхийлж буй хэрэг” хэмээн тодорхойлж, тэднийг “ХАМАС-ыг дэмжигчид” гэж буруутгаж байна.

Тухайлбал, Тафтсын их сургуулийн турк оюутан охин Израилийн Газад явуулж буй дайныг шүүмжилж бичсэнээр Луизиана дахь цагаачлагчдыг саатуулах төвд зургаан долоо хоног гаруй хоригдсон байна.

Трампын засаг захиргааны эл үйлдлийг АНУ-ын Үндсэн хуульд заасан үг хэлэх эрх чөлөөнд ноцтой халдсан хэрэг гэж олон улсын шинжээчид шүүмжилж буй юм.

Боловсролыг улстөржүүлснээр АНУ нэр хүндээ сэвтээж байна

АНУ-ын нэр хүндтэй их сургуулиуд гадаад оюутнуудаар дамжуулан олон улсын түншлэл, шинжлэх ухааны хамтын ажиллагааг бэхжүүлсээр ирсэн. Гэвч Трампын засаг захиргаа Харвард тэргүүтэй их сургуулиудын олон улс дахь нэр хүндийг унагааж, тэдгээрийг санхүүгийн хувьд дарамтад оруулж, гадаад оюутнуудыг хавчихад чиглэсэн алхмуудыг шат дараатайгаар хэрэгжүүлж байна. Гадаад оюутнууд сургалтын төлбөр өндөр төлдөг тул их сургуулиудын санхүүжилтэд чухал үүрэгтэй байдаг билээ.

Өнгөрсөн долоо хоногт Трампын засаг захиргаа Харвардын их сургуулийн гадаад оюутнууд элсүүлэх эрхийг хүчингүй болгох шийдвэр гаргасан. Харвардын их сургуулийн статистик мэдээнд дурдсанаар, 2023 оны намрын байдлаар гадаад оюутнууд тус их сургуулийн нийт оюутны 27 гаруй хувийг эзэлж байсан юм.

Боловсрол бол улс төрийн зэвсэг биш

Боловсрол, оюутны солилцооны хөтөлбөр нь улс орнууд хоорондын харилцан ойлголцлыг нэмэгдүүлж, энх тайвныг дэмжих хүчтэй хэрэгсэл байсаар ирсэн билээ. Харин АНУ аюулгүй байдал нэрийн дор боловсролын салбарыг улстөржүүлж, олон мянган залуусын ирээдүйг замхруулах эрсдэлд хүргэж байна.

Боловсролын салбарыг улс төрийн хэрэгсэл болгон хувиргаж, олон улсын залуусын эрхийг хавчих нь зөвхөн АНУ-д бус, дэлхий нийтэд сөрөг үр дагавар авчирна. АНУ энэ замаараа цааш явбал, нээлттэй, эрх чөлөөт нийгэм гэх имижээ алдаж, гадаад залуусын итгэлийг нэг мөр үгүй хийхэд ойрхон байна.

Г.Солонго