Энхийн найдвар: Орос-Украины ээлжит яриа хэлэлцээ

Талууд 2022 оны 3 дугаар сараас хойших анхны шууд яриа хэлэлцээг тавдугаар сарын 16-нд Истанбулд хийсэн бөгөөд үүний үргэлжлэл болгон энэ удаагийн уулзалтыг хийх гэж байна.

Украины Батлан хамгаалахын сайд бөгөөд энхийн хэлэлцээнд Украины талыг төлөөлөгчдийн тэргүүн Рустем Умеров мэдэгдэхдээ “Бид Оросын талаас 6 дугаар сарын 2-нд хийх уулзалтад зориулан энхийн ‘санамж бичиг’ ирүүлэхийг хүлээж байна. Ийм баримт бичиг нь яриа хэлэлцээ хий дэмий болохоос сэргийлж, бодит ахиц гаргахад ойртуулна” хэмээсэн байна.

Умеровын мэдэгдсэнээр, Украины тал байр сууриа илэрхийлсэн баримт бичгийг ОХУ-ын төлөөлөгчдийг тэргүүлэгч Владимир Мединскийд албан ёсоор хүлээлгэн өгөөд байгаа аж.

ОХУ-ын Гадаад хэргийн сайд Сергей Лавров лхагва гарагт мөн мэдэгдэл хийхдээ “ОХУ тогтвортой байдал, энх тайвныг тогтоохын тулд Украинтай дараагийн шатны шууд хэлэлцээг 6-р сарын 2-нд Истанбулд хийх санал тавьсан” гээд, “Энхийн үйл явц амжилтад хүрэхийг үгээр биш, чин сэтгэлээсээ хүсэж буй бүх хүн Орос-Украины шууд хэлэлцээний шинэ үе шатыг Истанбулд хийхийг дэмжинэ гэдэгт найдаж байна” гэсэн юм.

Олон улсын оролцоо: Энхийн яриа хэлэлцээнд улс орнуудын гүйцэтгэж буй үүрэг

ОХУ болон Украин хоорондын энхийн яриа хэлэлцээнд гуравдагч улс орнууд чухал үүрэг гүйцэтгэж байна. Тэр дундаа БНХАУ нь аливаа зөрчил, сөргөлдөөнийг дипломат замаар буюу яриа хэлэлцээгээр шийдвэрлэх байр суурь баримтлан, хоёр талд тэнцвэртэй хандсаар ирсэн.

Хятадын Гадаад хэргийн сайд Ван И энэ онд ОХУ-д айлчлах үеэрээ энхийн хэлэлцээг тууштай дэмжиж буйгаа мэдэгдэж, “Зөрчилдсөнөөр юу ч хожихгүй, харин энх тайвныг эрхэмлэх нь бүгдэд тустай” гэсэн байр суурийг илэрхийлсэн юм.

Хятад улс сүүлийн жилүүдэд олон улсын түвшинд энхийн хэлэлцээнд зуучлагчийн үүргийг эрчимтэй гүйцэтгэх болсны нэг тод жишээ бол Ойрх Дорнодод Саудын Араб болон Ираны хооронд зуучилж, талуудын харилцаа сэргэхэд чухал үүрэг гүйцэтгэсэн явдал билээ.

ОХУ болон Украины энхийн хэлэлцээнд ч Хятад улс төвийг сахиж, эв зүйг эрхэмлэж, яриа хэлэлцээний аргаар сөргөлдөөнийг шийдвэрлэхийг ийнхүү уриалсаар байна.

Үүний зэрэгцээ Турк улс сөргөлдөгч талуудын аль аль талынх нь хувьд геополитикийн чухал түнш учраас хоёр улсын яриа хэлэлцээний гол индэр болж, бүс нутгийн тогтвортой байдал, эв зүйг эрхэмлэсэн гадаад бодлогыг тууштай хэрэгжүүлж байна.

ОХУ болон Украин хоорондын энхийн хэлэлцээний ээлжит үе шат бол зүгээр нэг уулзалт бус, бүс нутгийн тогтвортой байдал, олон хүний амь, амьдралыг шийдэх үнэ цэнтэй үйл явц юм. Энэ удаагийн уулзалтаар сөргөлдөөнийг зогсоох бодит ахиц гарах эсэхийг дэлхий нийт анхааралтай ажиглаж байна.

Г.Солонго