Э.Болормаа: Дараагийн Ерөнхий сайд, Засгийн газар тогтвортой, цомхон байгаасай гэж хүсэж байна

МАН-ын Бага хурал эхлэхийн өмнө УИХ-ын гишүүд, намын шиүүд, улс төрчид цаг үеийн асуудлаар байр сууриа илэрхийллээ.

Энэ үеэр УИХ гишүүн Э.Болормаа ” Удирдах зөвлөл ямар үндэслэлтэй, ямар байдлаар тухайн хүн ажиллах эсэх бүх талаас нь харж байж сонгоно гэдэгт итгэж байна.

Намын бага хурлаас хамтрахгүй гэсэн шийдвэр гаргасан. Миний хувьд хамтарсан Засгийн газрыг дэмжсээр ирсэн. Намын 68 гишүүнийг эв нэгдэлтэй ахалж чаддаг хүн байх нь л чухал. Намын бүлэг болоод 126 парламентын олонх нь анх удаа сонгогдсон гишүүд байгаа. Манай бүлгийн 68 гишүүний 39 нь анх удаагаа сонгогдсон. Тэгэхээр зөвхөн  асуудлыг ордон дотор, нэг өнцгөөс харах бус нийтээр нь улс орныхоо асуудлыг мэдэрдэг, эв нэгдлийг хангаж чаддаг хүн байгаасай.

14 мега төслийг нэг дор багцалж ярих боломжгүй. Учир нь тус бүрийн санхүүжилтийн зураглал, төслийн өгөөж нь ялгаатай. Тухайлбал эрчим хүчний төсөл эргэн төлөгдөх чадвар өндөр байдаг. Учир нь иргэд, ААН-үүдийн хэрэглээний тарифаар зардлаа нөхдөг. Иймд бүгдийг багцалж ярихаас илүүтэй эдийн засгийн нөхцөл байдалтай уялдуулан, эрэмбэ дараалал гаргах хэрэгтэй. Хариу арга хэмжээний хувьд бид эдийн засгийн асуудалд давшингүй байх нь буруу биш. Олон талаас нь харж үзэх ёстой. 14 мега төсөл зөвхөн хамтарсан Засгийн газрын төсөл биш. Парламентын баталсан төсөл. Иймд дараагийн Ерөнхий сайд, Засгийн газар эдгээр зүйлсийн залгамж халааг нь бодолцож, тогтвортой, цомхон байгаасай гэж хүсэж байна.

Манай улсын хувьд барилга, бүтээн байгуулалтын хугацаа бага. Иймд цаг алдахгүй ажилдаа хурдан орох ёстой. Миний хувьд өмнө нь Ерөнхий сайдын ажлын албаны даргаар ажиллаж байхад тухайн Засгийн газрын дийлэнх нь “дан дээлтэй” сайд нартай байсан. Дан дээлтэй Ерөнхий сайд байтугай сайд байх нь ямар хэцүү гэдгийг ойрхноос харж, мэдэрсэн. Хэрэв дан дээлтэй Ерөнхий сайдыг нэр дэвшүүлж байвал зөвтгөлтэй л байх ёстой. Ер нь бол амаргүй. Бусад намын гишүүдтэй ойлголцож чаддаг, тогтвортой хүн байна гэдэгт итгэж байна” гэв.