АНУ “COVID-19” вирустэй тэмцэхэд 100 сая ам.долларын туслалцаа үзүүлнэ

АНУ-ын Төрийн департаментаас Хятад болон бусад орнуудад шинэ төрлийн коронавирус буюу “COVID-19”-ийн  халдварт өвчнөөс урьдчилан сэргийлэх ажилд 100 сая ам.доллар хандивлана гэдгээ зарласан байна.

Тодруулбал, Америкийн Засгийн газар шууд буюу олон талт байгууллагаар дамжуулан Хятад улс болон вирус тархсан бусад оронд 100 сая ам.долларын санхүүгийн тусламж үзүүлэх аж.

Энэ талаар урд хөршийн ГХЯ-ны хэвлэлийн төлөөлөгч Гэн Шуан “Халдварт өвчинд улс орны хил хязгаар гэж байхгүй. Америк болон олон улсын байгууллагын хандив тусламжид талархаж байна” гэжээ.

Ташрамд дуулгахад, АНУ-ын Төрийн департамент холбогдох байгууллагаар дамжуулан амны хаалт, хамгаалалтын хувцас зэрэг 16 тонн эд материал шинэ төрлийн коронавирусний эсрэг үйлсэд хандивлажээ.