Ц.Эрдэнэбаяр: АИ92 бензин тонн тутамдаа 58 ам.доллараар бууж орж ирсэн

“Иргэдийн хамгийн их хэрэглэдэг АИ92 бензин тонн тутамдаа 58 ам.доллараар бууж орж ирсэн. Литрийн үнийг нэгж үнэд шилжүүлэхэд нэг литрт 120-130 төгрөгийн бууралт ажиглагдана.

Дотоодын хэрэгцээн дэх шатахууны нөөц хэвийн байгаа тул хомсдол үүсэхгүй талаар АМГТГ-ын орлогч дарга Ц.Эрдэнэбаяр мэдэгджээ.

Тэрбээр “Иргэдийн хамгийн их хэрэглэдэг АИ92 бензин тонн тутамдаа 58 ам.доллараар бууж орж ирсэн. Литрийн үнийг нэгж үнэд шилжүүлэхэд нэг литрт 120-130 төгрөгийн бууралт ажиглагдана. Гэвч ам.долларын ханшийн зөрүү өнгөрсөн жилийнхтэй тооцогдоод явахад 80 орчим төгрөгийн зөрүү шууд тусна.

Тэгэхээр үлдсэн 40-50 төгрөгийн үнийн зөрүүг бид буулгана. Гурван сарын бүтээгдэхүүнд үнийн бууралт хийнэ. 1830 гэдэг үнэ 30-40 төгрөгөөр буурах нөхцөл байдал үүснэ гэсэн үг. Мөн бүтээгдэхүүн тээвэрлэлтийн хүрээнд УОК-оос өгсөн чиглэлийн дагуу орон нутгийн тээвэрлэлийг хязгаарласан. Сайд Д.Сумъяабазарын өгсөн чиглэлийн дагуу УОК-той холбогдож ажиллаж байна. Авто бензин бүтээгдэхүүн ямар нэгэн саадгүйгээр орон нутагт тээвэрлэлт хийгдэнэ. Ямар нэгэн хориг сааданд орохгүй” гэжээ.

Бөөний үнийн хувьд Улаанбаатар хот дахь “Магнай трейд” ХХК-ийн дизелийн түлш 60 төгрөг, “НИК” ХХК-ийн Аи-92 автобензин 40 төгрөг, дизелийн түлш 20 төгрөг, “Ай Си Ай Си” ХХК-ийн А-80 автобензин 110 төгрөг, Аи-92 автобензин 150 төгрөг, дизелийн түлш 100 төгрөгөөр тус тус буурсан бол Баян-Өлгий аймагт дизелийн түлш 100 төгрөг, Увс аймагт А-80 автобензин 50 төгрөг, Аи-92 автобензин 50 төгрөг, дизелийн түлш 50 төгрөгөөр тус тус буурчээ.