Монгол Улс коронавирусын ӨНДӨР ЭРСДЭЛТЭЙ ОРОНД тооцогдож байна

Засгийн газраас гурав дахь удаагийн эрсдлийн үнэлгээгээр Монгол Улс шинэ коронавирусын өндөр эрсдэлтэй орны тоонд орж байгаа талаар мэдээллээ. Тиймээс өнөөдөр ээлжит бусаар хуралдаж дараах шийдвэрүүдийг гаргаад байна.

Шадар сайд Ө.Энхтүвшин “Шинэ коронавирус маш хурдацтай тарж байгаа. Монгол Улсын эргэн тойронд шинэ вирусын халдвар гарсан. Гурав дахь удаагийн үнэлгээгээр өндөр эрсдэлтэй гэж үнэлсэн. Манай улсад тохиолдол илрээгүй байгаа хэдий ч эрсдэл маш өндөр байгаа тул санаа амрах эрх төрийн байгууллага төдийгүй иргэдэд алга байна” гэсэн юм.

Засгийн газрын хуралдаанаар гаргасан шийдвэрүүд:

1. Эрүүл мэндийн тусламж үйлчилгээний бэлэн байдлыг хангах, эмч эрүүл мэндийн ажилтнуудын илүү цагийн хөлсийг олгох, маск, халуун хэмжигч, мананцар үүсгэж халдваргүйжүүлэгч зэрэг тоног төхөөрөмжийг авах зардлыг шийдэхээр боллоо.
2. Хилийн боомтоор зорчих иргэдийн хөдөлгөөнийг хязгаарлах асуудлыг 2020 оны 1-р сарын 30-ны дотор шийдвэрлэхийг Гадаад харилцааны сайд болон холбогдох албан тушаалтнуудад даалгалаа. Ингэхдээ явган болон авто тээврийн хөдөлгөөнийг хамруулж байгаа бөгөөд агаарын тээвэр болон галт тэргээрх хөдөлгөөнийг оруулаагүй.
3. Их, дээд сургууль болон МСҮТ-ийн үйл ажиллагааг гуравдугаар сарын 2-ныг хүртэл зогсоохоор боллоо.
4. Найрамдал зуслан болон хүүхэд хамруулса, олон нийтийг хамарсан үйл ажиллагааг мөн хугацааг хүртэл зогсоохоор боллоо.
5. Цахим болон теле хичээлийг зохион байгуулна.
6. БНХАУ-ын Ухань хотод байгаа оюутнуудыг даруй авчрах асуудлыг шийдвэрлэхийг Шадар сайд болон БСШУС-ын сайд Ё.Баатарбилэг нарт даалгасан зэрэг болно.

Өндөр эрсдэлтэй орны тоонд тооцогдож буй тул ийнхүү яаралтай хуралдаж, шийдвэрүүдийг гаргаад байгаа талаараа тэрбээр тайлбарласан. Хязгаарлалт хийж байгаа учраас жолооны курсээс эхлээд бүх сургалтын үйл ажиллагааг зогсоох бөгөөд иргэдийг цахим сүлжээгээр цацагдаж буй мэдээлэлд бус албан ёсны эх сурвалжийн мэдээг хүлээн авч, өөрсдийн зүгээс авах арга хэмжээг авахыг албаныхан хүссэн юм.