Сэлэнгээс Улаанбаатарт ирж тусгаарлагдсан нэг иргэн тусгаарлалтаас гараад гэртээ 2-3 хоног архидан согтуурсан

Улсын хэмжээнд одоогоор 2,516 хүн тусгаарлах байранд байгаа аж.

Харин сүүлийн таван өдрийн байдлаар тусгаарлалтын 14 хоног нь дууссан 150 орчим иргэн тусгаарлах байрнаас гарчээ. Эдгээр иргэн гэрээр дэглэм сахиж, өөрийгөө тусгаарлах ёстой юм. Гэтэл Сэлэнгээс ирж, Улаанбаатарт тусгаарлагдсан нэг иргэн тусгаарлалтаас гарахдаа гэртээ 2-3 хоног архидан согтуурсан талаар УОК-ын Шуурхай штабын дарга Б.Ууганбаяр хэллээ.

Уг иргэнд тооцох хариуцлагын талаар тэрбээр “Энэ хүнд холбогдох арга хэмжээг авна. Хатуу ярина. Хууль тогтоомжийн хэрэгжилтийг хангуулна. Тусгаарлах байрнаас гараад гэртээ байх хугацаа маш чухал. 7-14 хоногийн хугацаанд гэртээ байхдаа дэглэмээ сайтар сахих ёстой.

Одоо бол хамгийн чухал үе. Мэргэжлийн байгууллагын хэлснээр далд үедээ байж байгаад хэнэггүй байдлаасаа болж олон нийтийн дунд явж, өвчин тараахвий. Энэ эрсдлийг бий болгохгүй байхыг хүсье. Анхаарлаа бүү сулруул.
Хэдийгээр өөрийгөө гэртээ тусгаарлах ёстой иргэдийн үүдэнд наалт наахаар бэлдсэн ч хүний эрхийг хүндэтгэн үзэж байгаа” гэв.