Израйль улсад суугаа Хятадын элчин сайд Тель Авив дахь гэртээ нас баржээ

Израйль улсад Хятад улсыг төлөөлөн суугаа элчин сайд Ду Вэй өчигдөр Тель Авив хот дахь гэртээ нас баржээ. Израйлийн гадаад хэргийн яам болон цагдаагийн газар 57 настай дипломатч нас барсныг баталсан ч үхлийн шалтгааныг мэдээлээгүй байна.

Тус улсын зарим хэвлэлүүдийн мэдээлж байгаагаар элчин сайд унтаж байх үедээ гадны нөлөөгүй нас барсан гэнэ.

Украин улсад гурван жил элчин сайдаар ажилласныхаа дараа Ду Вэй өнгөрсөн хоёрдугаар сард Израйльд томилогдож байжээ.

Тэрбээр Хятадын гадаад хэргийн яаманд 31 жил ажиллаж байгаа бөгөөд эхнэр, нэг хүүтэй юм байна.

Нас барахаасаа гурав хоногийн өмнө Ду Вэй коронавирусийн тахлын талаар АНУ-ын төрийн нарийн бичгийн дарга Майк Помпеогийн хийсэн мэдэгдлийг шүүмжилж байжээ.

Помпео дэлхий даяар коронавирусийн тахал тараасан гэм бурууг Хятад улсад тохож байсан юм.

Үүний хариуд Ду Вэй Израйлийн “Йерусалем Пост” сонинд өгсөн ярилцлагадаа “Одоогоор АНУ нь цар тахлын дэлхийн төв болоод байна. Ийм байдалд хүрсэн нь Хятад улстай холбоогүй, харин вирусийн тархалтыг хяналтдаа оруулах боломжийг алдсан Америкийн цөөн хэдэн улс төрчийн буруу юм. Тиймээс АНУ-д тохиолдсон зүйл нь зөвхөн байгалийн гамшиг төдийгүй буруу менежмэнтийн үр дүн гэж би үзэж байна” гэж байжээ.

АНУ-ын чухал холбоотон Израйль улстай Хятадын эрх баригчид хамтын ажиллагаагаа өргөжүүлэхийг хичээж байгаа ч саад бэрхшээлтэй тулгарч байгаа.

Сүүлийн жилүүдэд Хятад улсаас Израйлийн технологийн салбарт хөрөнгө оруулах хэд хэдэн оролдлогыг Тель Авивын засаг захиргаа хориглосон юм.

БНХАУ-ын гадаад харилцааны түүхэнд хоёр дахь элчин сайд гадаад оронд үүрэг гүйцэтгэж байх үедээ нас барсан нь Ду Вэй ажээ.

1981 оны гуравдугаар сард Перу улс дахь элчин сайд Шу Хуань өвчний улмаас нас барсан нь анхны тохиолдол болж байв.